కె.కె.//తెలిసేది-గజల్//

గెలుపెంత గొప్పదో తెలిసేది, ఓటమితోనే
పిలుపెంత చల్లనో తెలిసేది,ఓదార్పుతోనే
......
ఎదముల్లుని తీసేది, గడియారం ముల్లేలే
మరుపెంత మంచిదో తెలిసేది,వేదనతోనే
......
ఆరడుగుల మనిషైనా,అన్నానికి లోకువేలే
ధనమెంత సత్తువో తెలిసేది, ఆకలితోనే
......
పలకరింపు నవ్వులన్నీ,స్నేహగీతి కాదులే
మనసెంత తెల్లనో తెలిసేది,అనురాగంతోనే
......
పలుగాకుల లోకమేమో,పదిమాటలు మామూలే
చిత్తమెంత చిక్కనో తెలిసేది,సఫలాలతోనే
......
నివురుతోటి "కోదండ",నిప్పుసెగ ఆగదులే
ప్రేమెంత స్వచ్చమో తెలిసేది,పోరాటంతోనే
=================================
తేదీ: 13.08.2014

చిన్ననాటి ముచ్చట్లు - గజల్

ఎలా మరిచిపోనూ, చిన్ననాటి ముచ్చట్లు
ఎదను మోగుతుంటే, ఆ జ్ఞాపకాల చప్పెట్లు
.......
చెరుకుమడిని దాటుకుంటూ, బడికి ఉరకలేస్తుంటే
మువ్వలసడి వినిపిస్తూ, సాగిన ఆ జోడెడ్లు
.........
జడివానలో చిందులేసి,కేరింతలు కొడుతుంటే
తుమ్ములతో ఆవిరికై, దూరిన ఆ దుప్పట్లు
..........
రాజుగారి తోటల్లో, మావిళ్లని కోస్తుంటే
తోటమాలి అదిరింపుకి, పరిగెత్తిన ఇక్కట్లు
.......
చదువులన్ని ఎగవేసి, బ్యాటుతో ఆటకెడితే
చింతకర్ర సాక్షిగా, నాన్నేసిన చీవాట్లు
.......
ఏటిలోన ఈతలతో, వేసవి తాగేస్తుంటే
మితృని మరణంతో, కమ్ముకున్న చీకట్లు
.......
కాలమెంత కఠినమో, క్షణమైనా ఆగదు
దాటక తప్పదులే, "కోదండ" ఈ మెట్లు
============================
Date: 23/07/2014

ఇల్లాలు-గజల్

పూవు పూసినప్పుడేలే తావికి ధరహాసం,
ఇల్లాలు వచ్చినప్పుడే, జీవితాన మధుమాసం

ఎగుడు,దిగుడు రహదారిది, ఎదగాయా లెన్నెన్నో,
ఓదార్పు కోరినప్పుడే, తానేగా తొలిస్నేహం

గెలుపు పిలుపు, తలుపు తడితే పులకింతే ప్రతినిమిషం
తాను ఇంటి బరువులాగితే, తిరిగెను నీమీసం

లోకమెంత పెద్దదైనా, నీవేలే తనలోకం,
అలిగిన ఆ చూపులెప్పుడూ, వెదుకును నీకోసం

నీకొచ్చిన చలిజ్వరం,తనకాయే ఉపవాసం
మాయలేని పిచ్చిమనసునీ, చెయ్యకోయి పరిహాసం

మూడుముళ్ల కెంత బలం, అనుకున్నా "కోదండా"
ఆడవారి సహనంతోనే, శోభించె ఈదేశం
===============================
Date: 07.07.2014

ట్రాఫిక్-గజల్

చిరాకెందుకోయ్... నలుగురితో అడుగులేసి నడవడానికి,
చిరాకెందుకో... ట్రాఫిక్ రూల్స్ పాఠిస్తూ సాగడానికి
.............................................................................................
జుట్టూడుతూ పట్టగా మారిపోతోందా, బొచ్చుకన్న బతుకు విలువ ఎక్కువ కాదా,
చిరాకెందుకోయ్... నెత్తిమీద హెల్మెట్టుని పెట్టడానికి,
.............................................................................................
జోరుగెళ్తే దూరమేమో దగ్గరౌతదా,పొరబాటుతో జీవితమే బుగ్గైపోదా,
చిరాకెందుకోయ్... సహనంతో వాహనాన్ని, నడపడానికి,
.............................................................................................
సెల్ఫోనులో రింగొస్తే అంత ఆత్రమా, సర్కస్సు చేసేందుకు ఇదేమీ చిత్రమా,
చిరాకెందుకోయ్... చిత్తంతో గమ్యాన్ని చేరడానికి
.............................................................................................
మందేసి తొంగుంటే భలే మజాలే, బండెక్కితే పక్కోడికి అదే సజాలే,
చిరాకెందుకోయ్... మనిషిలాగ రహదారిన గడపడానికి,
...............................................................................................
ఇంటికాడ చిరునవ్వుల ఎదురుచూపులు, ఇనలేవులే ఎన్నటికి బెదురుమాటలు,
చిరాకెందుకోయ్... "కోదండ" మాటకి తల ఊపడానికి
==============================================
Date: 26.06.2014

ప్రయాణం-గజల్

అనుభవాలు ఎన్నున్నా, తుదకు మిగిలేవి కొన్నే
అనుబంధా లెన్నున్నా, ఎదను మీటేవి కొన్నే
...........................................................
పడినపుడే బడిగంట, గుర్తు చేసుకోమంట
పరుగులెన్ని పెడుతున్నా, అడుగులు నేర్పేవి కొన్నే
...................................................................
దొరలచెంత చేరినంతనే, మరిచావా మాతృభూమినే
పూటకూళ్లు ఎన్నున్నా, ఆకలి తీర్చేవి కొన్నే
...................................................................
నీ కాలిన ముల్లు విరిగితే, తన కంట్లో నీరు చిమ్మెనా
పరిచయాలు ఎన్నున్నా, స్నేహం పంచేవి కొన్నే
..................................................................
మీ నాన్న చెమట వాసన, మరచిపోకు విమానయాన
జ్ఞాపకాలు ఎన్నున్నా, బోధన చేసేవి కొన్నే
..................................................................
"కోదండ" జీవనయానం, అంతులేని ఓ ప్రయాణం,
వీడుకోలు లెన్నున్నా, బరువైన గుండెలు కొన్నే
===============================
Date: 24.06.2014

ప్రేమ-గజల్

కాదని అనగలనా...తనప్రేమే నడిపిస్తోందంటే,
కాదని అనగలనా... ఎడబాటే వేధిస్తోందంటే

చెంతలేకున్నా, వలపు సంకెలేసిందేమో,
కాదని అనగలనా... చెలిరూపం ఛేదిస్తోందంటే

ఏ మంత్రమున్నదో ఏమో... మతిపోయి తిరుగుతున్నాలే,...
కాదని అనగలనా... చిరునవ్వే ఆడిస్తోందంటే

కొమ్మలూగుతున్నా, పలకరింపు లాగున్నాదే
కాదని అనగలనా... చెలిఊహే లాలిస్తోందంటే

గుండె సవ్వడైనా, కొండ పేల్చినట్టుందే,
కాదని అనగలనా... తన మౌనం కాలుస్తోందంటే

ఎదురుచూపులెన్నున్నా, గెలుపుంది 'కోదండ'
కాదని అనగలనా... నీ విరహం సుఖమేనంటుంటే
=============================
Date: 14.02.2014

https://soundcloud.com/kodanda-rao/love-is-divine

Sneham-Ghazal

https://soundcloud.com/kodanda-rao/sneham-ghazal

స్నేహం-గజల్

మల్లె మనసులు కలిపి అల్లే దారమే స్నేహం,
నిండు గుండెలు కలిసిపాడే రాగమే స్నేహం. 

కొండ,లోయలు కంటికొకటే, మంచుతెర ముసిరేసిన
మంచి,చెడులని ఎంచిచూపే అద్దమే స్నేహం.

ఎండమావులు ఎదురుపడుతూ,ఆశలన్ని ఆవిరైతే
ఊతమిచ్చి,ఊపిరిచ్చే క్షీరమే స్నేహం.

పాతబడితే స్వర్ణమైనా,రోతపుడుతుంటుందిలే,
కాలచక్రం,చిక్కబరిచే మధురమే స్నేహం.

తనను తానే తడుపుకుంటూ, వణుకుతున్న పెదవిచూసి
గొంతుకలిపి, చింతదీర్చే నాదమే స్నేహం.

అమ్మ ఎపుడూ తోడురాదని, దైవమే గ్రహించెనేమో?
రాగబంధం, పొదిగివున్న హారమే స్నేహం.

ఒక్కడున్నా ఎక్కువేలే, కోదండ శతృవు,
వేలమంది పాడగల్గిన, వేదమే స్నేహం.
============================
Date: 04.08.2013

బోసినవ్వు-గజల్

బోసినవ్వు విసురుతాడు, మంచు కురిసినట్లుగా,
చిన్నిముద్దు చిలుకుతాడు,మనసు తడిసినట్లుగా,

విరిగినవి,చిరిగినవి పారేస్తుంటే,
భద్రంగా దాస్తాడు, నిధులేవో దొరికినట్లుగా,

అరచేతిని ఆకుచేసి, అన్నం పెడుతుంటే,
నలుమూలల తిరుగుతాడు, తననెవరో తలచినట్లుగా,

ముద్దు,ముద్దు మాటలతో కధలే చెబుతుంటే,
ప్రశ్నలెన్నో అడుగుతాడు, నా మనసే అలసినట్లుగా,

నా చేతిని ఊతచేసి, నడిపిస్తుంటే,
పరుగులు పెడుతుంటాడు, జగమంతా గెలిచినట్లుగా,

అందమైన అల్లరితో అలరిస్తుంటే,
కలుసుకో కోదండ, నీ బాల్యం పిలిచినట్లుగా
=================================
తేది: 14.02.2013

పరిమళం-గజల్

పరిమళాలు ఎన్నో, ఈ జగతికి సాక్ష్యం,
పరవశాలు ఎన్నో, నీ సుగతికి సాక్ష్యం.

నొప్పులతో మొదలై, నవ్వులతో ముగిసే
పురిటిమంచ పరిమళం, నీ జన్మకి సాక్ష్యం.

ఏటికొక్క తరగతి, మెట్లపైకి ఎక్కించే
నవపుస్తక పరిమళం, నీ ప్రగతికి సాక్ష్యం.

కారణాలు వెతికిస్తూ, కవ్వించే సొగసున్న
మధిర మత్తు పరిమళం, నీ మగతకి సాక్ష్యం.

ఏడడుగులు వేయిస్తూ, ఇరు బతుకు జతచేసే,
అక్షింతల పరిమళం, నవమైత్రికి సాక్ష్యం.

మనసులు ముడివేసే, తనువులు మురిపించే
మరుమల్లెల పరిమళం, తొలిరాత్రికి సాక్ష్యం.

సాధనతో కోదండ, శిఖరం అందేవేళ,
చిరు చెమటల పరిమళం, నీ గెలుపుకి సాక్ష్యం.
=========================
తేది:18.11.2012

పున్నమి-గజల్

పున్నమి పిలిచింది, సిరిగంధం చల్లినట్లుగా,
వెన్నెల చిలికింది, నా మనసే తుళ్ళినట్లుగా,

అందానికి కొలమానం, అవనిలోన తానే,
చిలిపిగా నవ్వింది, దిక్కులన్ని కుళ్ళునట్లుగా,

నీలిరంగు తెరమీద,చిత్తరువై తానే,
సెలయేటిని నిమిరింది, నిదురలోకి మళ్ళినట్లుగా,

అలివేణి చిరుకోపం, అవధులు దాటేస్తుంటే,
చెలి చెక్కిలి తాకింది, గమ్మత్తుగ గిల్లినట్లుగా,

చెదిరివున్న చెలికాళ్ళకు, చుక్కాని తానై,
తారలన్ని హారమయ్యె, దారంతో అల్లినట్లుగా,

ఆశలపై నీళ్ళు పడితే, కోదండను తానే
మెత్తగా చరిచింది, నైరాశ్యం చెల్లినట్లుగా

పెళ్లి-గజల్

పెళ్ళీనాటి జ్ఞాపకాల మల్లెలు, దాచుకో ఒక్కొక్కటే!
అందమైన అనుభవాల మువ్వలు, కూర్చుకో ఒక్కొక్కటే!!

ఊగే జుంకాలతో, విసిరే అరనవ్వుతో.. కళ్ళుచేసే బాసలెన్నో
పెళ్ళిచూపుల నాటి మాటలు, పంచుకో ఒక్కొక్కటే!!

ఆశీర్వచనాలతో, ఆనందపు నీళ్ళతో, కన్నవారి కళ్ళ కాంతులెన్నో
మార్చుకున్న తాంబూల గంధాలు, ఎద రాసుకో ఒక్కొక్కటే!!

తెరచాటు మాటున అరచేతులు ఉంచిన, అక్షింతల జల్లులెన్నో
మంత్రాలు ముడివేసిన ఘడియలు, తలుచుకో ఒక్కొక్కటే!!

అరమోడ్పు కన్నుల బిడియాల మాటలు, పూల మాటు గుస,గుసలెన్నో
పంచుకున్న తమలపాకు చిలకలు, నెమరేసుకో ఒక్కొక్కటే!!

ఆరుపదులు దాటినా కోదండ, ఆరని సుగంధమేలే ఈ ప్రేమ
మనసులు శృతిచేసుకున్న గీతాలు, పాడుకో ఒక్కొక్కటే!!

మిత్రమా

అందనిదేదో అందుతుందని అపేక్షించకు మిత్రమా!!!
అందినదాన్ని అందుకునేందుకు ఉపేక్షించకు మిత్రమా!!!

ఒరుసుకుందని రాళ్ళమద్యన ఏటిపయనం ఆగునా
దాతలకోసం చేతులుచాచి నిరీక్షించకు మిత్రమా!!!

సమ్మెటేస్తే బండరాయిలే ముక్కలవ్వక ఆగునా
మాటి,మాటికి మనసునైనా పరీక్షించకు మిత్రమా!!!

తాడుతోటి బిగించి లాగితే కొండకుదురులు వచ్చునా
ప్రజ్ఞలేని ప్రయత్నమెప్పుడు సుభీక్షించదు మిత్రమా!!!

చేదుగుళికలు ఎన్నిమింగిన చెదరకోయ్ 'కోదండ'
గడచిపోయిన పీడకలలను సమీక్షించకు మిత్రమా!!!

జీవితం-గజల్

ఏ జీవితమైనా గడిచిందా ఏదో వేదన లేకుండా!!!
ఏ నాటకమైనా ముగిసిందా ఏదో వాదన లేకుండా!!!

... కలల్లోనే గడిపేస్తుంటే.. కీర్తిశిఖరం అందుతుందా
ఏ దేశమైన పురోగమించిందా ఏదో సాధన లేకుండా!!!

నీళ్ళైనా నిలకడగుంటే.. రాళ్ళల్లో నాచు మొలవదా
ఏ ధర్మమైన జన్మించిందా ఏదో శోధన లేకుండా!!!

యంత్రం ఎంత గొప్పదైనా... తానుగా నడవదులే
ఏ పాపడైనా పుడతాడా ఏదో దీవెన లేకుండా!!!

జాబిల్లి వెన్నెల చల్లితే...కలువ మురియదా "కోదండ"
ఏ మనసైనా ప్రేమిస్తుందా ఏదో స్పందన లేకుండా!!!

ఆశ-గజల్

తలపునై నీ గుండె తలుపులు తెరవాలని ఆశ...
పిలుపునై నీ పెదవి తలమును తడపాలని ఆశ...

చిత్రమైన చైత్రమాసపు చల్లగాలుల వేళలో...
ఊయలూగే పూవునై నీ జడని చేరాలని ఆశ...

పిచ్చి పనులతో,రెచ్చగొడితే కోపగించే నీ కళ్ళలో...
కెంపునై నీ అందానికి మెరుగు దిద్దాలని ఆశ...

తడియారబోసిన నీ నల్ల కురులు నీలిమబ్బుని తలపించగా...
కిరణమై ఆ చీకటి సిగ నిమరుతూ పులకించాలని ఆశ...

జ్ఞాపకాల అలజడిని రేపే నీ ప్రేమ సుడిగుండాన...
ఎదురీదుతూ మరణించాలని ఆశ... నా ఆశ...

కె.కె.