గుప్పెడు మల్లెలు - 1

1)నావ గోదారిని దున్నేస్తుంటే...
   చంద్రుడి సేద్యం వెన్నెల విత్తులు చల్లేస్తూ

2) ఇష్టం లేని పెళ్ళి.. తేలుస్తుంది
    మొరాయించే మనసు బరువు ఎన్ని టన్నులో...

3) ఓడానని బాధ పడకు...
    ఎలా ఆడకూడదో తెల్సినందుకు ఆనందించు...

4) రోడ్డుపై ప్రతిబండిని ఆపి...
    కధలల్లే పోలీస్ కన్నా భావుకుడెవ్వరు???

5) నీడకు నిజం తెలుసేమో...
    నేలతోనే ఉంటుంది.. నేనక్కడకే వస్తానని...25apr12

6) బతుకంతా నీటిమయం.. నోట
   చొంగతో ప్రారంభమై, కుండ చిల్లుతో అంతం...25apr12

7) చాలామంది బ్రతికేస్తున్నారు
    చంపడం చట్టవ్యతిరేకం కారణం గా...

 

8) పంచదారలో ముంచిన కుంచె
   విదిల్చిన బొట్లు కాబోలు... నీ పిలుపు...

 

9) అబద్దానికి అబద్దం అని
    ఒప్పుకోడానికి భయం... నిజంగా మారాలని...

 

10) చావు స్టాంప్ అతకించని
      పోస్ట్... ఫైను కట్టి మరీ తీస్కోవల్సిందే

 

11) జీవితాన్ని పండించుకునే
     సేద్యం పెళ్ళి.. ప్రేమనే ఎరువుతో...

 

12) మాసినగుడ్డ ఈ రాజకీయం
      ఎంత ఉతికినా ...చిల్లుపడుతుందేమోకాని తెల్లబడదు...

 

13) అంతమెరుగని ఆశ...
      అంతుచిక్కని దైవం మనిషికి ఆక్సిజన్...

 

14) ఒక్కముద్దని లాగే జిహ్వ...
      లక్షల పదాల్ని వదుల్తుంది..అదుపు ముఖ్యం...

 

15) మనకి ఆధునికత లాభించింది ఒక్క పేర్ల విషయం లోనే...
      కుల,మతాల వాసనలిచ్చే తోకలు కత్తిరించేసాయ్....వసుదైక కుటుంబం

 

16) ఊరికే వచ్చిన ధనం మెదడుని దొలిచేస్తుంది...
      తేరగా వచ్చిన బంధం మనిషినే కాల్చేస్తుంది...

 

17) చీకటికి ధైర్యం చెబుతుంది
      కీచురాయి... మనిషిని భయపెడుతూ...

 

18) రాక, పోకల మద్య వారధి
       జీవితం... కొన్ని సున్నితంగా...కొన్ని కథినంగా...

 

19) ఒంటరిగా ఉండాలంటే భయం...
      అందుకే బాత్రూం సంగీతం ప్రతీ ఇంట్లో...

 

20) వృధాప్రయాస ఏకాంతానికై...
      మళ్ళీ,మళ్ళీ ప్రతిధ్వనించే నీ జ్ఞాపకాలతో...

 

21) గొప్పోడని తెలిసేది నోట్ల
      లెక్కతో కాదు... ఓదార్చే చేతుల లెక్కతో...

 

22) సరిగమలు తెలియకున్నా...
      ఆలుమగలు విద్వాంసులే... అను'రాగం'లో...

 

23) పరులకోసం నటించకు...
      నీ పాత్రనెవ్వరూ పోషించలేరు... నువ్వుతప్ప...

 

24) హృదయనివేదన కళ్ళతో
       తక్కువచూడు లోకాన్ని.. నొప్పెక్కువవుతోంది!!!
       కళ్ళ ప్రతిస్పందన...
       హృదయమా ఎక్కువగా స్పందించకు
       ఏడ్వలేక చస్తున్నా!!!

 

25) రెక్కలొచ్చిన చిరుదోమ
      ఆశ్చర్యం... నేనొస్తుంటే ఈ చప్పట్లెందుకో???

 

26) ఒకే పొరపాటు రెండుమార్లు
      చెయ్యకు..తప్పంటారు...కొత్తవి చాలా ఉన్నాయ్...

 

27) పధకాలన్నీ ప్రజలకేనట...
      ఆలికి చీరకొనడం ఊరికి ఉపకారం లా......ఊరికుపకారం లా???

శాస్త్రం-సత్యం

అహింసయే పరమధర్మం అంటూ బోధిస్తూ..
అడ్డొచ్చిన వాడిని హతమారుస్తారు!

రామ,లక్ష్మణుల కధలు వినిపిస్తూ..
సోదరుణ్ణే సొమ్ముకొరకు ముంచేస్తారు!

దైవం ముందర జనులెల్లరు సమానమనుచు...
పంచముణ్ణి అంటొద్దని వెలివేస్తారు!

మానవసేవ మాధవసేవగా ప్రకటిస్తూ...
గుడిసెలను కూల్చేసి, గుడి కట్టేస్తారు!

చెప్పేందుకే శాస్త్రం...జరిగిన చరితం...
చేసేదంతా సత్యం... దారుణకృత్యం...

K.K.

ఆశ-గజల్

తలపునై నీ గుండె తలుపులు తెరవాలని ఆశ...
పిలుపునై నీ పెదవి తలమును తడపాలని ఆశ...

చిత్రమైన చైత్రమాసపు చల్లగాలుల వేళలో...
ఊయలూగే పూవునై నీ జడని చేరాలని ఆశ...

పిచ్చి పనులతో,రెచ్చగొడితే కోపగించే నీ కళ్ళలో...
కెంపునై నీ అందానికి మెరుగు దిద్దాలని ఆశ...

తడియారబోసిన నీ నల్ల కురులు నీలిమబ్బుని తలపించగా...
కిరణమై ఆ చీకటి సిగ నిమరుతూ పులకించాలని ఆశ...

జ్ఞాపకాల అలజడిని రేపే నీ ప్రేమ సుడిగుండాన...
ఎదురీదుతూ మరణించాలని ఆశ... నా ఆశ...

కె.కె.

నా రిక్షా చక్రం

గిరా,గిరా తిరుగుతూ...
ఎత్తులెన్నో ఎక్కుతూ...
బరువు లెన్నో ఎత్తుతూ...
పల్లాలను తొక్కుతూ...
గతుకుల్లో,ముక్కుతూ...
మూల్గుతూ...
ఆగకుండా...అలవకుండా...
తిరుగుతున్న భూగోళం...
నా రిక్షా చక్రం!!!

పెట్రోల్ ధర పెరిగినా...
డీజిల్ ధర మండినా ...
నా నెత్తురు చమురుగా...
నా ముచ్చెమటల ధారలే...
స్నేహతైల తీరుగా..
గుక్కెడు గంజికి కరువై...
నెత్తిన సూరీడు బరువై...
నే సోలిన... తూలినా..
ఆగకుండా...అలవకుండా...
తిరుగుతున్న భూగోళం...
నా రిక్షా చక్రం!!!

ముళ్ళెన్నో గుచ్చినా...
రాళ్ళెన్నో గిచ్చినా...
పై తోలుకి ఎన్నిసార్లు...
కత్తుల వైద్యం చేసిన...
కొత్తముక్క లతికినా...
నా బతుకు బండి లాగుతూ...
నా ఆలు,బిడ్డల చల్లగా చూసేటి తల్లి...
నా రిక్షా చక్రం!!!

తీసికట్టే దీనిముందు...
లోకాలను పాలించే ఆ దేవుడి
సుదర్శన చక్రం!!!

నా రిక్షా చక్రం!!! నేల మీద నక్షత్రం!!!

కే.కే.

నవ్యలోకం

 మంచితనం ముసుగులో,వంచించే కుళ్ళుని కడిగేయాలనివుంది!!!

మాకెందుకులెమ్మని, పక్కకు జరిగే కళ్ళను తడిచెయాలనివుంది!!!

గ్రహచారం... గోచారం... అంకెలతో గుణకారం....
చేతిగీతలే, బ్రతుకుబాటగ నమ్మే కల్లను తుడిచేయాలనివుంది!!!
మాకెందుకులెమ్మని, పక్కకు జరిగే కళ్ళను తడిచెయాలనివుంది!!!

అందరి నెత్తురు ఎరుపు... బాధలో అమ్మనే పిలుచు....
దేవుడికే గడిగీసే, మూడాంధుల ఎల్లను చెరిపేయాలనివుంది!!!
మాకెందుకులెమ్మని, పక్కకు జరిగే కళ్ళను తడిచెయాలనివుంది!!!

పసిపాపల బోసినవ్వు... విరబూసిన జాజిపువ్వు....
కపటమంటే ఎరుగని, నవ్యవనం వీధుల్లో చల్లగా గడిపేయాలనివుంది!!!
మాకెందుకులెమ్మని, పక్కకు జరిగే కళ్ళను తడిచెయాలనివుంది!!!

అభిమానం,ఆత్మీయత...అనుబంధం,ఆరాధన...
నవ్యలోక ఆహ్వానంతో గుండెల సడిచేయాలనివుంది!!!
మాకెందుకులెమ్మని, పక్కకు జరిగే కళ్ళను తడిచెయాలనివుంది!!!

కె.కె.

పాపం ఎవ్వరిదని?

రోడ్డు పక్క,గట్టు మీద...
ఆకులేని మోడులా..
ఆచ్చాదన లేకుండా...
కూర్చున్నాడొక పిల్లోడు...
ముక్కుతూ,మూల్గుతూ...
ముసిరే ఈగలతో యుద్ధం చేస్తూ...

ముక్కుపచ్చ లారలేదు...
చిక్కుజుట్టు తీరులేదు...
కళ్ళలోని కాంతిలేదు...
బిచ్చమెత్తు శక్తిలేదు...

ఆరేడేళ్ళు దాటని వయసు...
ఆకలితప్ప అన్యమెరుగని మనసు...
పక్కనున్న బండరాతినే ...
పక్కగా తలచి సోలెను వాడు.

పొగ చిమ్ముతూ మోటర్ బళ్ళు..
సెగ గక్కుతూ తోపుడు బళ్ళు...
సాగుతు ఉన్నాయ్..దాటుతు ఉన్నాయ్...
తాము మరోలోకం అన్నట్లు...

ఆ పాపడు మరణిస్తే...
ఆ పాపం ఎవ్వరిదని...
ఆకాశం ప్రశ్నిస్తు...
కార్చెను కన్నీటి ధారావర్షం...

చిమ్మ చీకట్లు కమ్మెనప్పుడు...
దుమ్మూ,ధూళీ రేగెనక్కడ...
ఎగిరొచ్చిన్ దెక్కడి నుంచో...
ఒక ఎంగిలి విస్తరి..వాడిముందుకు...
నేనున్నా నేస్తం అంటూ!!!

కె.కె.

ఒక్కసారి వచ్చిపో

ఒక్కసారి వచ్చిపో... బస్తీ సోదరా...
నీకోసం పల్లె వేచి..ఎదురు చూస్తోందిరా...

భోగి పండగొచ్చిందంటే కాగుతాము చలిమంట...
కారులోన షికారుపోతే తీరేనా ఆ ముచ్చట...
సంకరాంతి పండగ వస్తే రంగవల్లి సిరిపంట...
ఏ షాపింగ్ మాలునైన ఆ అందం గాంచునా...

... ఆ చలిమంటల కోసం...సిరిపంటలకోసం...
ఒక్కసారి వచ్చిపో... బస్తీ సోదరా...
నీకోసం పల్లె వేచి..ఎదురు చూస్తోందిరా...

ఏటిగట్టు పాటలు...తోటలోన ఆటలు...
చిన్ననాడు కట్టుకున్న ఇసుకలోన కోటలు...
చిన్న చిన్న ఆనందాలు..గుండె నిండు మకరందాలు...
ఏ చీకటి క్లబ్బులోనో... చిందులేస్తే తీరునా...

ఆ ఆటలకోసం... ఆ కోటలకోసం...
ఒక్కసారి వచ్చిపో... బస్తీ సోదరా...
నీకోసం పల్లె వేచి..ఎదురు చూస్తోందిరా...

అమ్మచేతి లాలన.. నాన్నగారి దీవెన...
ఎంత మంది చెంతనున్న ఆ భావన సాటగునా..

ఆ లాలనకోసం... ఆ దీవెనకోసం...
ఒక్కసారి వచ్చిపో... బస్తీ సోదరా...
నీకోసం పల్లె వేచి..ఎదురు చూస్తోందిరా...

K.K.