మా ఊరి పిన్ కోడ్ మారిపోయింది

ఊరెళుతున్నా, మా ఊరికెళుతున్నా
రెండు పుష్కరాల తర్వాత,
ఊరికే కాదులెండి,
ఊరొదిలెళ్లిన ఇన్నిరోజుల తర్వాత,
నా చిరునామా వెదకడానికి,
నన్ను,నేను కలుసుకోడానికి,

మట్టిరోడ్డు మీదే నడిచినా,
రెండుపక్కలా పచ్చని గొడుగులుండేవి,
వాటిమీద ఊరపిచ్చుగ్గూళ్లు,
అక్కడక్కడ వేళాడే తాళ్లు...అవే ఊడలు,
నడుమొంపులు తిరిగిన చెరువు,
పక్కనే నక్కివున్న చాకిరేవు,

అక్షరాలు దిద్దిన బడి,
పచ్చకోక చుట్టిన వరిచేల మడి,
మేము నాటకమేసిన రాములోరి గుడి,
పక్కూరోళ్లతో ఆడిన కబ్బాడి,
మా హీరో గొప్పంటే,మా హీరో గొప్పంటూ
గిల్లికజ్జాల రచ్చబండ... త్రినాద్ కిళ్లీషాపు,
ఈశ్వర్రావు చేసిన చిరంజీవి క్రాఫు,

పరమేశ్వరి టూరింగుటాకీసులో చూసిన 'లేడీస్ టైలర్
తోటలో కాయలుకోస్తూంటే, చిరిగిన నా కాలర్,
భోగీ ముందురోజు పాతకర్రల దొంగతనం,
జోగీ గాడి మేడమీద చేసిన శివరాతిరి జాగారం,
ఎక్కడుందో...
నా చిరునామా వెతకాలి,
నన్ను,నేను కలుసుకోవాలి.
***************************
ఊరే... మా ఊరే....
నేలతల్లి నోరుతెరిచి చూస్తోంది,
గుక్కెడు నీళ్లతో గొంతు తడుపుకోడానికి,
నా చేతులు జేబులోకి పోయాయి,
రుమాలుతో కళ్లు తుడుచుకోడానికి,
ఊరంతా కాంక్రీటు అస్థిపంజరాలు,
భూ బకాసురులు వదిలెళ్లిన కళేబరాలు.
నా చిరునామా పోయింది,
మా ఊరి పిన్ కోడ్ మారిపోయింది.
======================
తేదీ:04.02.2013