గుప్పెడు మల్లెలు-23

1.
చావు,పుట్టుకల మద్య
ఎడం,
పెరగడం
2.
విజ్ఞానం ఎంత పెరిగినా,
బాధకి కొలమానం
దొరికేనా???
3.
నచ్చినోడి తప్పు,
తప్పనిపించదు.
కోపం మనకే,మనసుకి కాదు.
4.
మృత్యుసవ్వడి వింటూనేవున్నాం,
సాగిపో...
అవసానం ఆ ఒడ్డునవుంది.
5.
ఆకలిదోచే దొంగేలేడు,
ఆక్రందనల సంగీతం
ఆగిపోతుందనేమో???
6.
పోట్లాడేముందు మట్లాడు,
ఎడారి రొమ్మునకూడా
జలాశయం ఉంటుంది.
7.
కళ్ళది అనుభవం,
గుండెది అనుభూతి,
నిర్ణయం గుండెకొదిలెయ్.
8.
అక్షరాకులు పరిచా,
ఆశ్చర్యం...
భావకుటీరం వెలిసింది.
9.
మురికివాడేనని
చూపు తిప్పుకోకు,
స్వాభిమానం దాగుందక్కడ
10.
చెప్పేది పూర్తిగా విను,
నోరు ఒకటే,చెవులు రెండు
నిష్పత్తి ప్రకారం...
================================
తేదీ: 22.12.2012

గుప్పెడు మల్లెలు-22

1.
తప్పురాసింది పెన్నైతే,
కాగితాన్ని చింపేస్తాం.

కిందుంటే లోకువే
2.
చేవున్న లవంగం నిజం,
నోట్లోవేస్తే
చురుక్కుమంటుంది.
3.
ఫైళ్ళమీద సంతకానికి,
వేళ్ళమద్య
లంచాక్షరాలు
4.
నిరుద్యోగ సంఘం
బలవంతపుబహిష్కరణ,
రోడ్డుపక్క సేల్స్ మాన్
5.
ప్రశ్నలముళ్ళు లేవంటే,
తప్పుదారిలో ఉన్నట్టు.
ప్రశ్నలు గమ్యానికి ఆనవాలు.
6.
చూపులు ఒక అయస్కాంతం,
విసిరేయ్
అందమైన దృశ్యాలొస్తాయ్
7.
ఆత్మభ్రమణం తప్పుకాదు,
కానీ... వెలుగుకోసం
పరిభ్రమణం తప్పదు.
8.
'బిజీ' అని జవాబొస్తే,
నీకు ప్రాముఖ్యం లేనట్లు,
ప్రతీరోజుకీ 24 గంటలే.
9.
ఐకమత్యానికి అర్ధం వెతక్కు,
అనుమానమొస్తే
నీ పాదాలనడుగు.
10.
చరిత్ర చిటికెలో తయారుకాదు.
కొట్టిపారెయ్యకు
అది సంఘర్షణల సమాహారం.
=======================================
తేది:12/12/12

మలుపు

అక్షరాలు పిలుస్తున్నాయ్,
పుస్తకాలు మూసేసినా.

అనుభవాలు పరికిస్తున్నాయ్,
నవ్యలోకా నడుగేసినా.

ప్రశ్నలెన్నో మొలకెత్తుతున్నాయ్,
పాతదారినే నడిచినా.

జ్ఞాపకాలు వెంటాడుతున్నాయ్,
కాలచక్రం తిరిగినా.

మలుపులన్నవి సహజమేమో,
జీవితం ఎంత గడిచినా.
==================================
తేదీ: 06.12.12

తెలుగు భాష

పల్లవి:

పాడేనా తెలుగుపాటే పాడాలి

పండేనా తెలుగుచేనే పండాలి

          తెలుగుని తాకుతూ పైరగాలి

          నేలకి నలుమూలల తిరగాలి

చరణం:

నన్నయ్య,తిక్కన్న మనపూర్వికులే,

అన్నమయ్య,గోపన్న తేనెపంచెలె,

          ఘనమైన పూర్వచరిత మనకున్నదిలే

          పరభాషా కోవిదులే శ్లాఘించెనులే

పాలకడలి వరదించిన యజ్ఞఫలమిదే,

నేలకొరిగి పారనీకు, అమృతమిదిలే

చరణం:

కృష్ణశాస్త్రి సాహిత్యం మనసంపదలే,

శ్రీశ్రీ విప్లవశంఖం నవచేతనలే,

         జ్ఞానపీఠం ఎక్కినాడు జనసినారె,

         గూడపాటి చెక్కినాడు మనసుతీరే,

వినయంతో మనచరిత్ర నువ్వుచదువుకో, 

విజ్ఞతతో ఆ చరిత్ర తిరగరాసుకో

చరణం:

కాలంతో మార్పన్నది అతిసహజములే,

పాశ్చాత్యం, పరిణితికి ప్రగతిపధములే

         పరభాషా ప్రావీణ్యం ఆభరణములే

         మనభాష ప్రాచుర్యం ఆచరణములే

అమ్మలాంటి తెలుగుభాష అమృతవీణ, 

జన్మంతా కొలుచుకున్న ఋణం తీరునా!!!

============================

తేదీ: 09.12.12; 03;12  

జనకవి

నేనొక జనకవిని,
నిజానికి సుజనకవిని.
మ్రోగే చప్పట్ల కన్నా,
సగటుమనిషి గుండె చప్పుళ్ళే నాలక్ష్యం.

చేతులు పిసుక్కుంటే సమస్య మెత్తబడుతుందా,
చేవతో సంఘర్షించాలి.
అమ్ములపొదిలో శరాలు నిద్దురపోతే,

అవి లక్ష్యాన్ని చేదించలేవు.
అందుకే సానపెట్టిన సంకల్పాన్ని
జనం మద్య ధ్వజంలా నాటేస్తా.

నిజమైన,నిజానికి కాలదోషం పట్టదు.
మబ్బు కమ్ముకుంటే సూర్యునికి మరక అంటదు.
వ్యక్తిత్వం ఉబికి రావాలి,
కొలిమి నిప్పుల్లోంచి శిరసెత్తే సెగలా.

ముసురు పట్టిన పగటి ముఖంలా
మూల్గుతూ బతకొద్దు,
కుండపోత కురిసి,కురిసినా
ఎండలా రొమ్మువిరిచే నిలబడు.

గడ్డికప్పిన గోతులెన్నో...నా నడ్డివిరిచి,
నా ప్రయాణం ఆపాలనుకున్నాయ్.
కానీ సాగిపోతూనే ఉన్నా...
తల గుద్దుకుంటుందని కెరటం ఒడ్డుని మరిచిందా???

"పసవున్న లవంగం నిజం,
కొరికితే చురుక్కుమంటుంది.
కానీ నోట్లో నలిగాక,
నిస్సత్తువనుంచి నిద్దురలేపుతుంది."

అందుకే నేనంటాను... ఓ కవీ
చుక్కల వెనకాల ఏముందో చూస్తావ్,
నీ పక్కనున్నవాడ్ని ఏల మరుస్తావ్.
కవిత్వమంటే వెన్నెల,ఆమనీ కాదోయ్,
ఆకలి చావులకి అధికారులకిచ్చే హెచ్చరిక.
==============================================
తేదీ:28.11.2012

పరిమళం-గజల్

పరిమళాలు ఎన్నో, ఈ జగతికి సాక్ష్యం,
పరవశాలు ఎన్నో, నీ సుగతికి సాక్ష్యం.

నొప్పులతో మొదలై, నవ్వులతో ముగిసే
పురిటిమంచ పరిమళం, నీ జన్మకి సాక్ష్యం.

ఏటికొక్క తరగతి, మెట్లపైకి ఎక్కించే
నవపుస్తక పరిమళం, నీ ప్రగతికి సాక్ష్యం.

కారణాలు వెతికిస్తూ, కవ్వించే సొగసున్న
మధిర మత్తు పరిమళం, నీ మగతకి సాక్ష్యం.

ఏడడుగులు వేయిస్తూ, ఇరు బతుకు జతచేసే,
అక్షింతల పరిమళం, నవమైత్రికి సాక్ష్యం.

మనసులు ముడివేసే, తనువులు మురిపించే
మరుమల్లెల పరిమళం, తొలిరాత్రికి సాక్ష్యం.

సాధనతో కోదండ, శిఖరం అందేవేళ,
చిరు చెమటల పరిమళం, నీ గెలుపుకి సాక్ష్యం.
=========================
తేది:18.11.2012

//గుప్పెడు మల్లెలు-21//

1.
వాలుచూపే ఇష్టమట,
సూటిగాచూస్తే

మనసు చదివేస్తుందనేమో?
2.
ప్రార్ధన చేసానంటావ్,
నిజానికి అది అభ్యర్ధన,
మరోలా చెబితే యాచన
3.
కోర్కెలు ఎక్కువుంటే,
ఏడ్పులు
ఎక్కువుంటాయ్.
4.
నిజాలన్నీ నీడలేనా?
నీడలుకూడా నిజాలేనా?
సత్యం ఎప్పుడూ చిత్రం
5.
రాముడొదిలేసిన
రావణసైన్యం,
నేటి రాజకీయం
6.
ఖాళీస్థలమంతా ఖాళీ,
అందుకే
ఒకడినెత్తిమీద ఒకడు
7.
సానుభూతికోసం చూడకు,
సానుకూలంగా చూస్తే,
అది గాయం మీద కారం
8.
వేచిచూసే ఓపికలేకే,
విజేతల సంఖ్య
వేళ్ళమీద
9.
ప్రతీ భావానికీ
ప్రభావముంటుంది,
మనసు తాకితే
10.
ఏ మనిషైనా
ఎక్కువసార్లు మోసపోయేది,
తన చేతిలోనే.
===================================
తేది:14/11/2012

//ప్రేమ//

ప్రేమ...ప్రేమ...అంటారంతా,
దీని దుంపదెగ,
అంటే ఏమిటో,

అర్ధమై చావట్లేదు.

ప్రేమకోసం చచ్చారు కొందరు,
ప్రేమించి చచ్చారు మరికొందరు,
ప్రేమించలేదని గెడ్డం పెంచినోడొకడు,
ప్రేమించలేదని యాసిడ్ పోసినోడొకడు,
మందు తాగేవాడొకడు,
సందులో కాసేవాడొకడు
ఇదేనా ప్రేమంటే...
ఉన్మాదమేమో???

ఖాళీ సినిమాహాల్లో ఏదో ఒక మూలా,
పబ్లిక్ పార్కుల్లో చిట్టచివరి బెంచీలా,
ఊరవతల తోటల్లో పారదర్శ బుడగలా,
ప్రేమా ఇదేనా నీ చిరునామా,
కోరికేనేమో???
***************************
సాగుతున్న ఆలోచనలను,
భగ్నం చేస్తూ ఒక ఆక్రందన.
రోడ్డుపైన అడ్డంగా బస్సు తాకిన బైకు,
రక్తపుమడుగులో జంట..అగుపించింది నాకు.

ఆమెకు స్పృహ లేదు,
అతడికి సత్తువలేదు.
కళ్ళు తెరవని ఆ ముగ్ధ,
ఆతడి కళ్ళల్లో ఆదుర్దా,
శక్తినంతా చేతుల్లోకి చేర్చి,
ఆమెను ఆసుపత్రికి మార్చేవరకు
చెదరని ఆతడి పట్టుదల.

శస్త్రచికిత్స జరిగింది,
అతడికో వేలు తెగింది,
కాని ఆమె కళ్ళు తెరిచింది,
అతడి కళ్ళల్లో నవ్వు విరిసింది.
నా కళ్ళలో చెమ్మ నిలిచింది.
ఇదేనా ప్రేమ...
ఇదేనని నా మనసు చెప్పింది.
===================
తేదీ: 09/11/2012

//గుప్పెడుమల్లెలు-20//

1. 
ఆయన శృంగారం
ఒలికించేది...

డి"వైన్" మూడ్స్ లోనే
2.
ఎన్ని కలలో...
ఎన్నికలొస్తే
మద్యతరగతి మనసు
3.
ఏ మహానదికైనా,
జన్మస్థలం జానెడే,
ఒకటితోనే అనంతం
4.
చైతన్యానికి పదునుపెట్టే
కర్మాగారం,
మౌనం
5.
తారురోడ్డుపై కూడా కాళ్ళు
చిక్కుకుంటాయ్.
నిరాశ గుండెనంటితే
6.
రంగునిబద్ధత లేనిది రక్తం,
వర్ణ వివక్ష లేనిది
సత్యం
7.
అగ్రరాజ్యమైనా
ఆకాశం ఆగ్రహిస్తే
అదోఃగతే
8.
నిద్రపోతున్న గుండె
తట్టిలేపేది
జ్ఞాపకం
9.
ఫోర్జరీ విద్య
మొదలయ్యేది
ప్రొగ్రెస్ కార్డులనుంచే
10.
గుండెబరువు
తెలిసేది
ప్రేమించిన గుండెకే.
=======================================
తేది:05/11/12

ఒకటో తారీఖు సుల్తాన్

"చెల్లియో,చెల్లకో" అంటూ,
ఎప్పుడో,చిన్నప్పుడు...
నాటకాలు చూసేటప్పుడు,
నేర్చిన నాలుగు పద్యాలని,
ఒత్తులు మింగేస్తూ వినిపిస్తాడు.
రసికతనంతా,రంగరించి
రక,రకాల భంగిమల్లో అభినయిస్తాడు.

నేను సోడాలందిస్తుంటే,
నా చేతికి మందిస్తాడు.
నేను దూరంగా జరిగితే 
వెటకారపు నవ్వు విసిరేస్తుంటాడు.
"సహపానం,సమభావనకు సోపానం" 
అంటూ తత్వం వల్లిస్తాడు.

చంటిదేడిస్తే,చిరాకుతో
పంటికింద పెదవి కొరికేస్తుంటాడు.
యం.టివి కొక్కిరాయి అరుపులకి
కంటిపాప పెద్దది చేసి చెవులర్పిస్తాడు.
ఆ బృందఘోషలో,తన మందుగొంతు కలిపి
యా..యా..అని అరుస్తుంటాడు.

మీసం మెలేస్తూ,తొడ చరుస్తూ,
మెడవిరుస్తూ..తానే మహారాజంటాడు.
వచ్చీ,రాని ఇంగ్లీషులో 
చచ్చిపోతున్న తెలుగుభాషపై లెక్చరిస్తాడు.
ఆఫీసులో బాసు,తాను వేసిన 
డోసుముందు బలాదూరంటాడు.
మావీధి అల్లరిమూకల,
తోకలు కత్తిరిస్తానంటాడు.
నాలుగు మెతుకులు కతికి నిద్దరోతాడు.
************XXXXXX************
పొద్దున్నే టిఫిన్ డబ్బాతో,
కొమ్ములకి రంగేసిన ఎద్దల్లే పరిగెడతాడు.
మా ఆయన ఏక్ దిన్ కా సుల్తాన్,
నిన్న "ఒకటో తారీఖు" మరీ.
=======================
తేది: 01/11/2012

గుప్పెడు మల్లెలు-18

1.
సొమ్ములున్న అత్తకి,
అమ్మప్రేమ తాకట్టు...

ఇల్లరికం
2.
ఆనందానికి
కొలమానం,
మరో ఆనందం
3.
అక్కడక్కడే తిరుగుతుంది కాలం...
గడియారంలో,
అయినా ఆపలేం
4.
"పాపం మంచోడే"అంటారు,
మంచోడు కన్నా ముందే
పాపం
5.
చావు గెలుపు కోసం పరుగు,
గెలిచాడని
పక్కోళ్ళంతా ఏడుపు
6.
ఉప్పునీళ్ళు పుక్కిళిస్తోంది
దశాబ్దాలుగా
సముద్రానికి నోటిపూతేమో,
7.
తప్పించుకోలేము,
తప్పుకోనూలేమూ,
సంసారం
8.
పక్కా ప్లానింగ్ తో
తప్పు చేసేది
మనిషొక్కడే
9.
దుర్మార్గుణ్ణి
సుఖంగా ఉండనీ...
సన్మార్గుడు బ్రతికేస్తాడు
10.
రాక, పోకల మద్య
వారధి
జీవితం...
============================
Date: 24-10-2012

కె.కె.//గుప్పెడు మల్లెలు-19//

1.
నీ ఎత్తుని చూసి గర్వపడకు,
నీ చేతికర్ర పైకెత్తితే 
ఇంకా పొడవు
2.
వ్యక్తంటే ఒకడే అనుకున్నా
ఇద్దరు... 
కనిపించేవాడు,దాక్కొనేవాడు
3.
మానవత్వ పరమాన్నం
మాడుకంపు కొడుతోంది,
విలువలు అడుగంటాయ్
4.
మదిర మత్తు మరురోజు వరకే,
మగువ మత్తు వదిలేది 
మట్టిలో కలిసాకే
5.
గుండె కిటికీ 
తెరిచిచూడు,
లోకమెంత శోకమయమో 
6.
అందం ఆరాధిస్తే
సంస్కారం,
ఆరేసేస్తే వ్యభిచారం
7.
విషాదానికి ఔషధం
సహనం...
దానిలోంచే సంగ్రామం
8.
అద్దం సిగ్గుపడే అందం ఆమె,
అది పగిలిపోయే చూపు
లోకం
9.
ప్రేమించి బాధపడకు,
అవి రెండూ
నాణానికి చెరోపక్కా
10.
గురి ఉంటే సరా???
లక్ష్యం నిర్ణయించుకో ముందు
మానవత్వ పరిధుల్లో
=========================
Date: 26/10/2012

దసరా పండగ

పండగ..పండగ...పండగ,
దసరా పండగ,
సరదా పండగ,

మనసు పరదాలు విప్పే పండగ

పూలని కురిసే దసరాబాణం,
చిల్లర రాల్చే దసరాకట్నం,
సంతలో తిరిగే రంగులరాట్నం,
కొత్తబట్టలతో,బొమ్మల కొలువుతో
పిల్లల మనసులు కొల్లగొట్టే
పండగ...పండగ...పండగ,
సరదా దసరా పడగ

కోడిపందాల హోరా,హోరీ,
వేటకూరల వాడి,వేడి,
చీట్లపేకలతో ఆడి,పాడి,
నాటకాల పద్యాల సందడి,
యువతమనసు ఎగరేసుకుపోయే,
పండగ...పండగ...పండగ,
సరదా దసరా పడగ

కొత్తల్లుడికో ముత్యపుటుంగరం,
అల్లరిచేసే,మరదళ్ళగారం,
ఆయుధపూజల,నాగళ్ళ సోయగం,
పట్టుచీరల్లో,పుణ్యస్త్రీల పేరంటం,
పండగ...పండగ...పండగ,
సరదా దసరా పడగ
===========*==========
పైనున్నదంత గతవైభవం,
నే చెప్పినదంతా...
మసక,మసకగా కనిపిస్తున్న నా బాల్యం ,
ఇప్పుడంతా పాశ్చాత్య వైభోగం,
టి.వి.తోనే దినం,దినం సంసారం...
పల్లె... ఆ మాటకెపుడో కాలం చెల్లె
======================
తేది:17.10.2012

అర్ధంకాని ఉద్గ్రంధం

చదువుతున్నా నేను మనుషులని,
చదివేందుకు పయత్నిస్తున్నా మనసులని,
అర్ధం అయినట్లున్నా,

అన్నీ తెలిసినట్లు అనిపిస్తున్నా,
ఇదొక అర్ధంకాని ఉద్గ్రంధం అని గ్రహిస్తున్నా.

కవ్వించే కళ్ళను చూసా,
కౌగిలిలో ఒక ప్రియుడిని దాచి,
నటిస్తున్న కన్నీళ్ళని చూసా,
గుండెల్లో క్రొధం దాచి,
చిరునవ్వుల కౌగిళ్ళను చూసా,
మాటేసిన కొడవళ్ళను దాచి,
అన్నీ తెలిసినట్లు అనిపిస్తున్నా,
ఇదొక అర్ధంకాని ఉద్గ్రంధం అని గ్రహిస్తున్నా.

ఖాదీ బట్టల్లా, సాదా,సీదాగా అగుపిస్తూ
సిల్కు తళుకులు ఒలికిస్తున్నాయ్,
శ్రావ్యమైన కోకిల గొంతుని వినిపిస్తూ
కాకి రొదతో విసిగిసున్నాయ్
గాలివాటపు కాగితంలా
జాలిమాటలు వినవస్తున్నాయ్
అన్నీ తెలిసినట్లు అనిపిస్తున్నా,
ఇదొక అర్ధంకాని ఉద్గ్రంధం అని గ్రహిస్తున్నా.

కఠినశిలలా కనిపించే మంచుహృదయం చూసా,
కాషాయం కట్టిన, కామ పిశాచిని చూసా,
మద్యతరగతి పెద్దపులి,మేకపోతు గాంభీర్యం చూసా,
సారా తాగేందుకు కారణాలు వెతుక్కునే మేధవుల్ని చూసా,
అన్నీ తెలిసినట్లు అనిపిస్తున్నా,
ఇదొక అర్ధంకాని ఉద్గ్రంధం అని గ్రహిస్తున్నా.
=================================
Date:13/10/2012

పున్నమి-గజల్

పున్నమి పిలిచింది, సిరిగంధం చల్లినట్లుగా,
వెన్నెల చిలికింది, నా మనసే తుళ్ళినట్లుగా,

అందానికి కొలమానం, అవనిలోన తానే,
చిలిపిగా నవ్వింది, దిక్కులన్ని కుళ్ళునట్లుగా,

నీలిరంగు తెరమీద,చిత్తరువై తానే,
సెలయేటిని నిమిరింది, నిదురలోకి మళ్ళినట్లుగా,

అలివేణి చిరుకోపం, అవధులు దాటేస్తుంటే,
చెలి చెక్కిలి తాకింది, గమ్మత్తుగ గిల్లినట్లుగా,

చెదిరివున్న చెలికాళ్ళకు, చుక్కాని తానై,
తారలన్ని హారమయ్యె, దారంతో అల్లినట్లుగా,

ఆశలపై నీళ్ళు పడితే, కోదండను తానే
మెత్తగా చరిచింది, నైరాశ్యం చెల్లినట్లుగా

కె.కె.//గుప్పెడు మల్లెలు-17//

1.
అడక్కపోతే అమ్మైనా
పెట్టదు, అడక్కుండానే భానుభిక్ష...ఉదయం
2.
తొందరగా కళ్ళుతెరు,
సగం జీవితం గడిచిపోయిందప్పుడే
3.
పేరు చివర గాంధీ,
మరి పరిపాలనలో గాంధారి
4.
ఎవడిది ఏదారైనా
తప్పక కలిసేది వల్లకాట్లోనే
5.
కంట తడి,గుండె సడి అంటే
తెలుసా... అయితే నువ్వు కవివే
6.
సుదీర్ఘవాక్యం జీవితం,
కామా మంచమ్మీద కునికిపాట్లొద్దు
7.
మనుషులు ఇండియాలో,
మనసులమెరికాలో...ఓ వృద్ద జంట
8.
వర్షించే మేఘమైనా,గర్జిస్తూ
భయపెడుతుంది. నేర్చుకో ప్రకృతినుంచి...
9.
ఎన్ని జాగరణలో
కవిత్వం వెలిగించేందుకు
10.

అక్షరాలు రమిస్తేనే
కావ్యంపై వీక్షనలు చరించేది

కె.కె.//గుప్పెడు మల్లెలు-16//

1.
విడి,విడిగా ఉంటే రాళ్ళే,
చప్పట్లు కొడితే...నిప్పురవ్వలు

2.
చూసేది కళ్ళైతే,
గుండెకెందుకో మద్యలో బాధ
3.
ఆయన కలానికి పదును
ఎక్కువ, అన్నీ ఎర్రకవితలే
4.
ఏడుస్తారు,ఏడిపిస్తారు,ఏడుస్తారు
బాల్యం,యవ్వనం,వృద్దాప్యం....జీవితచక్రం
5.
గుండెలో ముల్లు దిగితే గాయం,
గడియారం ముల్లు తిరిగితేనే అది మాయం
6.
జీవిత సాగరమధనంలో,
ప్రేమనే విషం,మరుపనే అమృతం పుట్టాయ్
7.
ఖాళీ కడుపులుగా ఉంచకు,
కాలే కడుపులుగా మారితే... నువ్వుండవ్
8.
అమ్మ ఒళ్ళో ఆర్నెల్లే,
మంచం ఒళ్ళో అరవయ్యేళ్ళు.
9.
భూమి స్ట్రాంగ్ లేడీ,
చంద్రుడు ఎన్ని చక్కర్లు కొట్టినా పడట్లేదు
10.
దేవుడు కనిపించడు,
అలాగని లేడనీ అనిపించడు...జగమే మాయ

గుప్పెడు మల్లెలు-15

1) ఎవడో  పట్టకం పెట్టాడు
తెలుపు రంగు కాస్త ముక్కలవుతోంది

2) నీకు పోటీ నువ్వే,
నిన్నటి కన్నా, ఈరోజు పరిణితి ఎంత?

3) మల్లయుద్ధంలో ఇద్దరూ
విజేతలే...మల్లెలే వాడాయి... కాదు,ఓడాయి...

4) పదిగంటల లైన్లో నించొని
దేవుడ్ని చూసి కళ్ళు మూస్తారెందుకో???

5) చూపు నింగివైపేనా?
ఎంతెత్తున్నా,పునాది కిందేరా నాన్నా

6) గతితప్పిన గాడి,
శృతితప్పిన జోడీ ఆగిపోతేనే క్షేమం

7) బతుకంతా క్రీడలే
ఆది తొట్టెక్రీడ, అంతం పాడె క్రీడ

8) ఇంగ్లీషు పేపరే వాడతాడు
ట్రైన్లో వెళ్ళేప్పుడు...జనరల్ కదా.

9) ఆర్ట్ మూవీస్కి ఆయుష్షు తక్కువ...
అర్ధమయ్యేలా రాయి కవిత్వాన్ని

10) రాజకీయం మంటపెడితే..
ప్రజాస్వామ్యం భగ్గుమంది

ది షాడో

మధుబాబు షాడో కాదు,
ఇది మామూలు నీడే,
నీడలకి అసహనం కలిగింది,
ఆగ్రహం వచ్చింది.
ఎప్పుడూ మనం డిపెండెంటేనా అని,
ఎవరో ఒకరి రూపానికి పెండెంటేనా అని,
నా ముందు వాటి గోడు వెళ్ళగకాయ్.

"ఏ గొట్టంగాడో నడిస్తే,
వాడివెనక చట్రంలా వెళతాం,
వర్షానికి తడుస్తాం,
ఎండొస్తే మాడతాం,
వాడుమాత్రం గొడుగుల్లో...
టోపీ తొడుగుల్లో దాక్కుంటాడు.

రోజుకో రంగుడ్రెస్ వాడికి,
గుడ్డల్లేకుండా మేము,
రింగు,రింగుల జుట్టు వాడ్కి,
రాయి,రప్ప మా ముఖానికి,
సెంటుల్లో,డిఫరెంటు సువాసనల్లో వాడు,
మురికి గుంటల్లో,ముళ్ళతుప్పల్లో మేము,

మమ్మల్ని ఎప్పుడూ పట్టించుకోడు.
కానీ మమ్మల్ని వాడేస్తుంటాడు,
వాడేసి, పాడేస్తుంటాడు.
నీ నీడ నేనే, నా తోడు నువ్వే అంటూ...

వాడి అరాచకత్వాన్ని అంతం చెయ్యాలి.
నియంతృత్వాన్ని నిగ్గదియ్యాలి,
నిరంకుశత్వాన్ని బుగ్గిజెయ్యాలి,
మాకూ ఒక రూపం కావాలి."

అని అంటూ ఉండగానే
చీకటి పడింది,
వాటి ఉనికి మాయమయ్యింది.
నీడలు, నీడలే
నిజాలు,నిజాలే. 
=================================
Date: 30/09/2012

నిశ్చల ప్రకృతి

రోజూ కొండల్ని చూసి
జాలిపడేవాడిని,
మనలాగా కాళ్ళూ,చేతులూ

యదేచ్చగా తిరగాలని
వాటికుండదా అని.

ఆశ్చర్యపడేవాడిని,
మనతోపాటే పుట్టిన జీవనదులతో
కరచాలనం చెయ్యాలని
అనిపించదా అని.

వెక్కిరించేవాడిని,
కనీసం మా చుట్టూ ఉన్న
మొక్కలు,చెట్లు గాలి సాయంతో
తలలాడిస్తాయి. ఆమాత్రం
చలన తృప్తి కూడా లేదే అని.
************************
నేను స్వాప్నికావస్థలో ఉండగా
కొండలు తమ అంతర్వాణిని
నా ముందు ఆవిష్కరించాయి.

ఓరి వెర్రి మనిషి!!!
మాకూ మీలాగే తిరగాలని ఉంటుంది.
మా మొదళ్ళు పెరికేసుకుని
విహరించాలనీ ఉంటుంది.

కానీ మేము చలిస్తే,సృష్టి
తలకిందులవుతుంది.
మా అడుగులకు మీ పుడమి
రొమ్ము చితికిపోతుంది.
ప్రాణులు గగ్గోలు పెడతారు.
మీకు రక్షణ కరువవుతుంది.

మేము మీ దుఃఖానికి హేతువు
కాకూడదనే కదలడం లేదు.
యుగ,యుగాలుగా ఉన్నచోటే
నిశ్చలంగా ఉండిపోయాం.
ఇది ఎవరి ఆజ్ఞ కాదు.
మీకోసం మేము తీసుకున్న
సామూహిక కఠిన నిర్ణయం.
************************
ప్రకృతి అంటే అందాన్ని,
అహ్లాదాన్ని పంచేవే కాదు.
రక్షణని కల్పించేవి కూడా
అని అర్ధం అయ్యింది.
క్షణ,క్షణం చపలచిత్తమైన
మనిషికి కొండలిచ్చిన సమాధానం
ఒక గుణపాఠం.
కాదంటారా???
======================
తేది: 14.09.2012

//అసంపూర్ణ స్వప్నాలు//

అసంపూర్ణ కలలు కనడం 
అలవాటే చాలామందికి,
రాత్రికిరాత్రే కొటీశ్వరుడైనట్లు,

చిత్రసీమనేలే హీరోలైనట్లు,
సిక్స్ తోటి విజయాన్ని,శతకాన్ని పూర్తిజేసినట్లు,
అందాలరాశితో హుందాగా గడిపినట్లు,
వేలమందిని,కనుసైగతో అదిలించినట్లు,
ఎక్కువగా నిద్రపోతే వచ్చేవి
కలలు కాక ఇంకేమిటి???

ఆ కలల్లో ఒక్క సుఖమే కావాలి.
డబ్బు కావాలి,జబ్బల్లో నొప్పి పుట్టకూడదు.
కారు,పేరు కావాలి,చెమటనీరు చింద కూడదు.
మనిషి ఎంత సుఖ లాలసుడంటే...
చినుకులు పడితే పరవశించినవాడే,
ఎడతెగని వాన కురిస్తే చిరాకు పడతాడు.
లేతచలికి తన్మయించినవాడే,
వణికించే చలికి ముడుచుకుపోతాడు.
తొలకరి ఎండని ఆశ్వాదించినవాడే,
మండే ఎండకి నీడని ఆశ్రయిస్తాడు.
కాలధర్మమైన ఋతువుల్ని కూడా
బండ బూతులు తిడుతూ గడిపేస్తాడు.

కలలు కనాలి,
అవి పూర్ణ స్వప్నాలు అయ్యుండాలి.
కలల సాకారానికి తలలకు పనిజెప్పాలి.
==============================
Date: 22/09/2012

కె.కె.//సారిచెప్తే పోయేదానికి//

మూడు రోజుల వయసొచ్చింది
నా మౌన పోరాటానికి,
యుద్ధం గొప్పగా సాగిస్తున్నానని 

నేను అనుకోవడమే తప్పా,
అబ్బే... మనసొప్పుకోవడం లేదు.

గడియారం,దాని అలారం
తొలికోడి కూత.
ముద్దుగా లేపడం,
ముద్దుల్తో లేవడం...హ్మ్...
అబ్బే...పొద్దు పొడిచింది.

కాఫీ,టిఫిన్లు అందుతున్నాయ్
గాజుల సందడే లేదు.
లాంచనంగా లంచ్ బాక్సూ అందుతోంది
కాని,కంచంలో చెయ్యే కదలడం లేదు.

ఆఫీసు అయిపోయినా
అలసట తగ్గట్లేదు ఎందుకో రోజూలాగ?
పరిచయమున్న ప్రతీవాడు హాయ్ అంటున్నాడు
ఖర్మ, హాయి ఎక్కడుంది?
చుట్టూ ఇంతమందున్నా ఈ ఒంటరితనమేమిటో?

కొప్పులోని మల్లెపూలు గుప్,గుప్ మంటున్నాయ్,
ఛేతికున్న మట్టిగాజులు ఘల్,ఘల్ మంటున్నాయ్.
కాళ్ళ గజ్జెలు రమ్మ్,రమ్మ్ మంటున్నాయ్.
గుండె ఝల్,ఝల్ మంటోంది,ఊహున్.. మండుతోంది.
ఆరున్నర అడుగుల మంచంలో,ఇద్దరికీ రెండున్నర సరిపోయేది.
ఇప్పుడు నాల్గున్నర ఉన్న ఒక్కడికే సరిపోవడంలేదు.

మనసు మూలుగుతోంది,
ఈ మూడు రోజుల మొదటి ఘడియనుంచి
అయినా వింటేనా...అహంకారం,
మొగుడనే అహంకారం,
మగాడనే అహంకారం,
పురుషాహంకారం.

తను నవ్వితే చాలు,
వల,వలా ఏడవాలనిపించేస్తొంది.
అయినా ఇవేమైనా గల్లీ యుద్ధలా???
గిల్లికజ్జాలు...వీటికి ఇంత బాధ అవసరమా???
ఈ నిశ్శబ్దం చేసే చప్పుడికి
నా కర్ణభేరి కమిలిపోయేటట్లుంది.

"ఐ యాం సారి, వెరి,వెరి సారి"
"నిన్ను చాలా బాధ పెట్టాను"
వెధవ ఈగో,నిజానికి బాధపడింది నేనే,
అంతే...మళ్ళా ఆనందం నా కౌగిట్లో,
ఒకసారి 'సారీ' అంటే సరిపోయేదానికి,
ఈ 'ఈగో'ల స్వారీ ఎందుకు?
ఎవరు గెలిచినా,గెలిచేది ఐ కాదు వుయ్.
:::::::::::::::::::::::::::::::::::::::::::::::::::::
Date: 04.08.2012

//మనసుతో వినాలి//

కవిత్వం అంటే ఏమిటి???
ఒక చిక్కుప్రశ్న,చాలా పెద్దప్రశ్న.
అది ఒక పరకాయ ప్రవేశం,
అప్పుడప్పుడు పవస్తు ప్రవేశం.
ఒక ఆలోచన, ఒక ఆక్రందన,
ఒక ఆవేశం, ఒక విజ్ఞానం,
విరహం,ప్రేమ,త్యాగం,లాలిత్యం
ఇంకా ఏదో,ఇంకేదో...
...

కవిత్వం,భావుకత్వం
ఎవడబ్బా సొమ్ముకాదు.
ఏ ఒక్కడి సొంతం కాదు.
మనం చూసేదే చూస్తూ,
మనకు తెలీని అంతరాల్ని
కొలిచే వాళ్ళెందరో!!!

రోడ్డుపైన బస్సో,కారో
నడిపేవాడు విన్యాసాలుచేస్తే,
తాగినడుపుతున్నడేమో అంటాడు ఒకడు.
తాగితే ఎలా నడపాలో ప్రాక్టీస్
చేస్తున్నాడని అంటాడు వేరొకడు.
దృశ్యం అదే,దృక్కోణం వేరు.

జానపదాలెన్నో,
జనం నుంచి పుట్టాయి.
అక్షరం రాయ చేతకానివారే
అయినా లక్షల భావాల్ని వినిపించారు.
లక్ష్మీకటాక్షం కనిపిస్తుంది.
కానీ వాణీ కటాక్షం వినిపిస్తుంది.
మనసుతోవినాలి... అంతే.
******************************
తేది:12/09/2012

//నీ హక్కుని అస్త్రం చెయ్//

క్షమించు మిత్రమా!
తప్పంటున్నానని,
తప్పించుకుంటున్నావని ఆరోపిస్తున్నానని 

బాధపడకు.
తప్పదంటున్నాను..అంతే.

కుర్చీమీదున్నా,పక్కన కూర్చున్నా,
జరిగేవి,జరిపేవి మహాసభలే,
మోగేవి,సాగేవి ఆరోపణల అలలే,
రెప్పవాల్చినంత సరళంగా,
గాలిపీల్చినంత సహజంగా,

కరెంటుకోత ఎంతున్నా..గ్యాస్ కబుర్లతో
మహోజ్వలంగా కాంతి విరజిమ్ముతోంది.
గుక్కెడునీళ్ళకు గతిలేక పోయినా,
వాగ్ధానాల ధారలు ముంచేస్తున్నాయ్.
నిఖార్సయిన పల్కుల విత్తనాలు,ఎరువెయ్యకుండానే
నాల్కల పాదులై పాకి ఎరగా పంచేస్తున్నాయ్.

పిల్లులుప్పుడో గోడదూకడం మానేశాయ్.
దండెం మీద ఆరేసిన కండువాలా
ఇంటిపై జెండారంగులు మారుతుంటె
ప్రతీ జెండాకి ఎవేవో ఎజెండాలే,
మూడుగంటల రంగురీళ్ళ సినిమాలా
బహు రూపాల్లో చూపే భవితవ్యాలే,
అంతరాత్మగొంతునొక్కి,అబద్దాల తేనెపూసి
పెదాలు విషాలు కక్కుతున్నాయ్.
వినే చెవులు ఎగబడి వింటున్నాయ్.
తిరిగే రోజులు కలబడి దొర్లేస్తున్నాయ్.

ఎన్నో సుడిగుండాలు చూసిన నీకు,
ఇప్పుడెగిరే ఈ దుమ్ము నీ కంట్లో
కొట్టేందుకే అని తెలీదా???
స్వఘోషణల,పరదూషణల పరిభ్రమణంలో
చిక్కుకున్న ప్రేక్షకుడా!!!
వేదాంతం ముసుగులో వైరాగ్యం నటించకు.
నీ మౌళికహక్కుని అస్త్రం చెయ్.
ఈ నకిలీ దివ్వెలని అంతం చెయ్.
xxxxxxxxxxxxxxxxxxxxxxxxxxxxxx

Date: 01.09.2012

సార్ధకత

ప్రణాళిక ఉండాలి దేనికైనా,
పధకం సిద్ధం చెయ్యాలి ఏ పనికైనా,
సమయ పరిమితి అదుపుతప్పితే,
వాయిదాలతో క్యాలెండర్,పుటలు తిప్పితే
కాలం, ఖాళీ అవక మానుతుందా???

చూసే చూపుకి శక్తుంటే,
శూన్యంలో రంగుల చిత్రం కనిపిస్తుంది.
ఆవులింతల్ని, ఆవిరిపొగలుగా మార్చగల్గితే
అందుకునే లక్ష్యం, ఆరడుగుల దూరంలో అగుపిస్తుంది.

చెమట పట్టిందని,పిడికిలి బిగి సడలిపోతే ఎలా?
కారుమబ్బు అడ్డొచ్చిందని, పొడిచే పొద్దు ఆగిపోతుందా?
చేవున్న చిగురుకే చీడపురుగు పట్టేది,
ఎండుటాకుకి కాదు.
సత్తావున్న చేతికే చెమట పట్టేది.
పసలేని, ముసిలి కండకి కాదు.

అడ్డొచ్చే అవరోదాల్ని,గడ్డిపరకల్లా దాటేస్తే,
సాగే పాదం, లక్ష్యంపై చిరునామా ముద్రిస్తుంది.
సంకల్పానికి పరిపూర్ణ రూపం సాధిస్తేనే,
ఏ ఆశయానికైనా సార్ధకత లభిస్తుంది
::::::::::::::::::::::::::::::::::::::::::::::
Date: 28/08/2012

"వాదా"-02

పల్లవి:భద్రంగా ఉండమంటిరే
చిత్రంగా రోడ్డుమీదే నడవమంటిరే....2సార్లు
పేవ్ మెంటు లేకుండా రోడ్డులన్ని జేస్తిరే,
యాక్సిడెంటు లెక్కల్ని లచ్చలల్లే పెంచిరే,
సచ్చినోడి నోటిమీద,నోటుపెట్టి మూస్తిరే...

చరణం:మందిలోన మూడోవంతు కాలినడక పోయేటోళ్ళే
బతుకుబండి తోసుకుంటూ బస్తీలో తిరిగెటోళ్ళే,
పేదోడై పుట్టడం చేసుకున్న పాపమా?
చేదోడు నివ్వమంటే మామీద కోపమా??
కారులున్నవాడికే, తారురోడ్డు లున్నవా??...//భద్రంగా//
చరణం:కాలిదారి కోసమంటూ, చట్టాలు జేసిరంట,
వాహనాల వీలుకై, ఆటినే  కాజేసిరంట,
దేశమంత నడిసేది, కారులల్ల కాదురా
రోడ్డుమీన నడిసేటోన్ని, బంధువల్లె సూడరా
నెత్తుటేరు పారకుండా, అడ్డుకట్టలెయ్యరో.....//భద్రంగా//

చరణం:ఆశుపత్రి మందుల్ని,అమ్ముకున్న ఊరుకున్నం
ఇస్కూలు డబ్బులన్ని,మింగుతున్న ఊరుకున్నం
ధరలెన్నో పెంచి మమ్ము,దోచుకున్న ఊరుకున్నం
పళ్ళూడ గొట్టేల,పన్నులెస్తే ఊరుకున్నం
దారికూడా దోచేస్తే గమ్మున్న కూసుందుమా?/?
నిలదీయకండ ఉందుమా???
నిగ్గదీసి నిప్పులే రాజేయకుందుమా??? 

"వాదా"- 01

పల్లవి:-
నడక మరచిపోవునేమో పట్టణవాసి,
ప్రభుత్వాలు నడిపే రహదారులు చూసి,
దేవుడిచ్చిన కాళ్ళకు కళ్ళెం వేసి,
ప్రమాదాల తెరదీసెను, పేవ్ మెంటులు మూసి

చరణం:-
రోడ్డుపైన నడవడం ప్రతీవాడి హక్కేగా,
నడకకుంటు పడితే, అది వంటికి ముప్పేగా,
వాహనధారులకే రోడ్డులు రాసిచ్చేస్తే
బడికెళ్ళే పిల్లలైనా, బస్సుల్లో వెలుతుంటే
ఆయామం,వ్యాయామం అందని ద్రాక్షే
గమ్యానికి చేరడం తప్పని శిక్షే
ప్రగతి దాగిలేదు ఒక్క హైవేల్లోనే
జగతి నడవకుంటే, భవిత చుక్కల్లోనే
చరణం:-
పేరుకి మాత్రమే ఇది సుందర నగరం,
మగడు ఇల్లు చేరువరకు ఆగదు ఆత్రం,
గరీబోడి మరణానికి జవాబు కన్నీరా
ప్రణానికి వెలకట్టే నవాబు  లున్నారా?
రోడ్డుపక్క నీడకెపుడో చెల్లెను కాలం,
కాలిదారి జాడ కూడా అయ్యెను మాయం
ప్రశ్నించకమానదులే "వాదా" ఈ విద్రోహం

//నిర్ణయం మీదే//

సామెతలు, ఉపమానాలు పక్కనబెట్టు,
స్థిమితంగా కూర్చొని నీ మెదడుకు పదునుపెట్టు,
సత్యం ఏమిటో కనిపెట్టు,

పెద్దలు చెప్పేరు కదా అని,
ప్రతీది సత్యం అనుకుంటే పొరపాటు.

"చెప్పేవాడికి,వినేవాడు లోకువట"
పెద్దల మాట!!!
వాడేలేకుంటే ....
ఎవడికివాడే మేధావనుకుంటాడు.
బావిలో కప్పలా బ్రతికేస్తాడు.

మేధకు పదునుబెట్టే మాటలే చాలనుకుంటే,
గంపెడు జీవితసత్యాలు,గుప్పెడు మల్లెలుగా
ఎప్పుడో మీముందుంచాను.
అందులో గుబాళించినవెన్నో మీరే చెప్పాలి.
అందిన ప్రతీది అర్హమైంది కాదు,
కొరికి చూస్తేనే కదా!
కాయో,పండో తెలిసేది.

తర్కిస్తేగాని సూత్రాల నాణ్యత తెలీదు,
గీటురాయితో గాని బంగారం నిగ్గు తేలదు
ఎంతటి ధర్మాసనమైనా, ఇచ్చేతీర్పు
సమకాలీన ధర్మాన్ని పాఠించాలి.
పెద్దల మాటలెప్పుడూ సూచనలు మాత్రమే
అవి ఆచరణలేనా అన్న నిర్ణయం మీదే.

//పరిశీలించు కాస్త లోతుగా//

మంచుగడ్డని తాకి చూస్తే
కఠినంగా ఉంటుంది.
దానికి నీ చెవిని ఆనించి చూడు

లోపల ఉన్న జల హృదయం వినిపిస్తుంది.

సుడిగాలి విజృంబిస్తే
నీ నడక అగమ్య గోచరం.
దాని పురాణ జీవితం గమనిస్తే
లాలించే పిల్లగాలుల కధలు చెబుతుంది.

అలా,అలా పేజీలు తిప్పితే
శాస్త్రం వంటపట్టదు.
ప్రతీ పంక్తిలో మునకలేస్తేనే
అక్షరాల ప్రఘాడత్వం ఆవిష్కృతమౌతుంది.

చిన్నపిల్లలు చిందులేస్తే
చిరాకు పడకు.
వాటిలో ఎన్ని రానున్నకాలంలో
రాజ్యాలు ఏలనున్నాయో???
సమాంతరంగా నడిచే కాలమే సాక్ష్యం చెబుతుంది.

అలవోకగా చూస్తే అన్నీ అంతుపట్టవు
పరిశీలించాలి.... కాస్త లోతుగా
ఎంత ఎత్తైన మేడలైనా,
వాటి మూలాలు
అడుగున పడి ఉన్న పునాదులే.

హ్యూమనిస్టు

ఎండైన,వానైనా
గాలైనా,ధూళైనా
సైకిలెక్కి వీధులన్ని తిరుగుతూ

కల్తీలేని కబుర్లందించే
నిత్యఖర్మచారి పోస్టుమాన్.

ఖాకీ బట్టలతో,లేఖల కట్టలతో
మంచీ,చెడూ... వార్తలేవైనా
చిరునవ్వుతో తలుపుతట్టే ఆత్మబంధువు,
సమన్వయంతో సాగిపోయే బాటసారి,
నిజానికి లోకం గుర్తించని కమ్యూనిస్టు.

అదే..అదే..అందరికీ తెలిసిందే
జీవితం ఒక నాటకం,
తెరతీస్తే జననం,తెరమూస్తే మరణం
తెలియనిదొక్కటే
ఏ దృశ్యం కుదిపేస్తుందో?
ఏ ఘట్టం మదిదోస్తుందో??

తంతి రాగానే,గోడక్కొట్టిన బంతిలా
ఆతృత పడతారందరూ..చదివెయ్యాలని,
వాటిలో పైకి ఎగదోసేవెన్నో,
కిందికి దిగదోసేవెన్నో,
కవరు చివర పసుపుచుక్కలున్నా,
ఖర్మకాలి ఇంకు మరకలున్నా,
వార్తలేవైనా ఆతడి మందహాసం మామూలే
అందుకే నిజంగా అతడొక కమ్యూనిస్టు
కాదు..కాదు..నిజానికి గొప్ప హ్యూమనిస్టు

కనిపించే నరకాలేమో???

వైరాగ్యం అనుభవిస్తోంది
నిశ్శబ్దంగా నగరం,
చీకటితో జతకట్టేసింది

చింతలేని మహాపట్నం,

తన నీడని చూసి తనే
ఉలిక్కిపడింది దీపస్థంభం,
తన చప్పుడికి తనే
తత్తరపడుతోందీ నాచేతి గడియారం,

చీకటికి పహారా కాస్తోంది కీచురాయి,
ఒళ్ళు మరచింది పేవ్మెంట్ పై
బిచ్చగాళ్ళ బృందం నిద్దరోయి,
పరవశిస్తోంది అమ్మకౌగిలిని చంటిపాపాయి,
కలవరిస్తోంది పచ్చిక .. ప్రకృతిలోని హాయి,

కునికిపాట్లు పడుతూ నేనింకా కంప్యూటర్ ముందే,
కార్పొరేట్ ఆఫీసులంటే కనిపించే నరకాలేమో???

//లక్ష్యం//

దిద్దుబాటు లేకుండా రాసిన కవితంటూ ఉందా?
సర్దుబాటులేని జీవితముంటుందా??

...

ఓడినంతమాత్రాన నీ జాడ మరుగైనట్టుకాదు,
సానుభూతికోసం ప్రయత్నిస్తూ చతికిలపడకు.
ఓడిపోవడం చెడ్డపని కాదు,
అలాగని,ఆగిపోవడం దొడ్డపనికాదు.
ఓటమి కారణాలు చెప్పేందుకు ప్రయత్నించకు,
గెలుపు తోరణాలు సిద్ధించేందుకు యత్నించు.

ఓడినవాడి కారణాలు వినేదెవ్వడు,
గెలిచినవాడ్ని కారణాలు అడిగేదెవ్వడు.

అలసిపోతే ఆశించిన ఫలితం దక్కదు,
లక్ష్యం... మగ్గిన మావిడిపండు కాదు,
గాలికి రాలి నీ చేతిలో పడేందుకు.
నిట్టూర్పుని నిషేధించు,
బద్దకాన్ని బహిష్కరించు,
నిర్విరామ సాధన చెయ్,
గెలుపు నీ తలుపు తట్టకమానదు.

గురి ఉంటే విడిచిన శస్త్రం, లక్ష్యం చేదించక మానదు.
దృఢచిత్తం ఉంటే గమ్యం,ముంగిట్లో వాలక ఆగదు.

ప్రశ్న

ప్రశ్నలు ఎన్నెన్నో మనిషి మస్తిష్కంలో
ప్రతిక్షణం, ప్రతీదినం..అడుగడుగునా
ప్రతీరోజు మారే తేదీ, ఆరోజు పరీక్ష కోసం
హాల్ టికట్ నెంబర్ లా కనిపిస్తుంది.
క్యాలెండర్ వైకుంఠపాళిలా కనిపిస్తుంటుంది.

కొన్ని ప్రశ్నలు తటాలున పుడతాయి
వాటి సమాధానాలు అంతే వేగంగా తడతాయి
ఆకాశంలో మెరుపు మెరిసినట్లు
సముద్రం లో అల ఎగిసినట్లు

కొన్ని ప్రశ్నలు గొంతు దాటేందుకు సంశయిస్తాయి
వాటి సమాధానాలకు రూపముండదు, ఊహలు తప్ప
ఇవి వేదిస్తాయి...అప్పుడప్పుడు బాధిస్తాయి
ఆకాశం ఎత్తు కొలిచినట్లు
సముద్రం లోతు తెలుసుకున్నట్లు

కొన్ని ప్రశ్నలు సూటిగా ఉంటాయి
చెప్పాలంటే సూదిగా ఉంటాయి
అవి తిన్నగా మనసు పొరలను తాకుతాయి
వీటి సమాధానం కోసం మేధోమదనం జరగాలి
వీటికి సమాధానం చిక్కేది ఆలోచనా శక్తిమీదే
అవి తాకే గాలిలా కనిపించకున్నా కదిలిస్తుంటాయి

కొన్ని ప్రశ్నలు అంతరంగ అంతర్జాలంలో
కొన్ని ప్రశ్నలు బాహ్యవ్యక్తుల వ్యాఖ్యానంలో
కొన్ని ప్రశ్నలు పసిపిల్లల అమాయకత్వంలో
కొన్నిప్రశ్నలు కనిపించే,వినిపించే ప్రకృతిలో
ఇలా ఎన్నెన్నో...వెంటాడుతూనే ఉంటాయి
మనిషి జీవనయాత్రలో, మరణశయ్య చేరేవరకు

ప్రశ్నలతోనే మనిషి పరిణితి, ప్రగతి
ప్రశ్నలే లేవంటే... చలనమున్నా జీవం లేనట్లే

పెళ్లి-గజల్

పెళ్ళీనాటి జ్ఞాపకాల మల్లెలు, దాచుకో ఒక్కొక్కటే!
అందమైన అనుభవాల మువ్వలు, కూర్చుకో ఒక్కొక్కటే!!

ఊగే జుంకాలతో, విసిరే అరనవ్వుతో.. కళ్ళుచేసే బాసలెన్నో
పెళ్ళిచూపుల నాటి మాటలు, పంచుకో ఒక్కొక్కటే!!

ఆశీర్వచనాలతో, ఆనందపు నీళ్ళతో, కన్నవారి కళ్ళ కాంతులెన్నో
మార్చుకున్న తాంబూల గంధాలు, ఎద రాసుకో ఒక్కొక్కటే!!

తెరచాటు మాటున అరచేతులు ఉంచిన, అక్షింతల జల్లులెన్నో
మంత్రాలు ముడివేసిన ఘడియలు, తలుచుకో ఒక్కొక్కటే!!

అరమోడ్పు కన్నుల బిడియాల మాటలు, పూల మాటు గుస,గుసలెన్నో
పంచుకున్న తమలపాకు చిలకలు, నెమరేసుకో ఒక్కొక్కటే!!

ఆరుపదులు దాటినా కోదండ, ఆరని సుగంధమేలే ఈ ప్రేమ
మనసులు శృతిచేసుకున్న గీతాలు, పాడుకో ఒక్కొక్కటే!!

అనుభవ రాహిత్యం

ఒక సాయంత్రం,ఒంటరిగా కోనేటిపక్కన కూర్చున్నాను,
వేడెక్కిన మెదడుతో,బరువెక్కిన గుండెతో,
సమాజం పోకడపై అసహనం తో.. ఆగ్రహంతో
...
విసుగెత్తిన మనసుకి,నులువెచ్చని కౌగిలి ఇస్తూ
పచ్చికబైళ్ళు మెత్తలుగా పరుచుకున్నాయ్.
కల్మాషాల కుళ్ళుని చూసి కలతచెందిన నాకళ్ళు,
నీలాకాశంలో మేఘాలను నగ్నంగా చూసి మురిసిపోతున్నాయి.
అరుపుల తొక్కిసలాటలో నలిగిపోయిన నా చెవులు,
అలల సంగీతాన్ని,అరేబియన్ గీతంలా ఆశ్వాదిస్తున్నాయ్.

వలపు కోనేరు పొలాన్ని,సంధ్యాకిరణాలు దున్నేస్తున్నాయ్.
రెండుపక్కల నిటారుగా నిలిచున్న మావిడిచెట్లు,
ఆతిధ్యం స్వీకరించమని ఆహ్వానం పంపుతున్నాయ్.
అప్పుడప్పుడు,ఎంగిలిపడే కొంగల ముక్కులపై
తాకిన కిరణాలు ముక్కెరలై మెరుస్తున్నాయ్.
కరిగిపోతున్న కాలాన్ని చుక్క,చుక్కగా
ఆశ్వాదిస్తూ.. గుటకలేస్తూ గడిపేసాను.

అప్పటిదాక మిన్నకుండిన నా మనసు
ఒంటరిగా ఉన్నావంటూ,తుంటరిగా సైగచేసింది.
ఆలోచనలు,అస్తమించడం ప్రారంభం అయ్యాయ్.
కాసేపటికి ఏదో విసుగు నాలో, పరిగెత్తడం ఆరంభించింది.
వెంటనే అడుగులు,అనుమతి అడగకుండానే
అంగలువెయ్యడం మొదలెట్టాయ్...
జనప్రవాహంలో తరగలెత్తక తప్పదులే అంటూ

అప్పటిదాక ఆనందించిన నా మనసే
కాసేపటికి తిరిగి ఉపదేశించింది నన్ను హెచ్చరిస్తూ...
అందంగా ఉందని,ఆహ్లాదం పంచిచ్చిందని
కోనేట్లో కాపురం ఉండలేం కదా అని,
ఎప్పుడైనా జరుపుకునేది మాత్రమే పండుగ అని,
వానప్రస్థం స్వీకరించాల్సింది వార్ధక్యంలోనేనని

కాలికి బురద అంటిందని, నరికేస్తామా???
కడిగేస్తాం...కుదరకపోతే కనీసం తుడిచేస్తాం.
కుళ్ళిపోతున్న సమాజాన్ని సంస్కరించు,
నీ వల్ల కాకపోతే పక్కకు జరిగి నమస్కరించు,
అంతేకాని సమాజాన్ని బహిష్కరిస్తే ఎలా???
నీ అనుభవరాహిత్యం కాకపోతే అంటూ గీత ముగించింది.
అప్పుడే తెలిసింది ప్రకృతి అందాలు,నిశ్శబ్ద సమయాలు
అలసినప్పుడు సేదదీరడానికి మాత్రమే అని!!!

రాశి

మెరుపు మెరిసినంత మాత్రాన
వానచినుకు రాలదు
నిబ్బరంగా నిలబడ్డ
మేఘగర్బం మెలితిరిగితే తప్ప,

తలగోక్కున్నంత మాత్రాన
ఆలోచన తట్టదు
సమయస్పూర్తి, సంపూర్ణ ఆర్తితో
మేధకు పదునుపెడితే తప్ప,

నాట్లు వేసినంత మాత్రాన
పైరు ఏపుగా పెరగదు
కలుపు తీస్తూ, ఎరువులేస్తూ
పుడమితల్లిని లాలిస్తే తప్ప,

మీట నొక్కినంత మాత్రాన
వాహనం నడవదు
నిదానంగా, నిలకడగా
నియంత్రణతో నడిపితే తప్ప,

కలం పట్టినంత మాత్రాన
మంచికవిత జనియించదు
ఆవులిస్తున్న కలం ఒళ్ళువిదిల్చి
మనసుతో లోకాన్ని చూస్తే తప్ప,

రాసినదంతా రాశిగా పొయ్యి,
జల్లెడ కుదుపుకి ఆగినదిమాత్రమే జనానికి ఇయ్యి

చీకటి

ఇప్పటి చీకటికెన్నెన్ని రూపాలో తెలుసా?
అది తొండముదిరి ఊసరవెల్లిగా మారింది.
పగలంతా ఎక్కడో గుహలో దాక్కొని,
ఏ చిన్నదీపం చూసినా వెన్నుచూపే
పాతకాలపు చీకటి కాదిది.
దశావతారాలే ఆ మహావిష్ణువుకి,
అనంతావతారాలు ఈ పెంజీకటికి.

ఫైళ్ల మీద సంతకానికై వేళ్ళసందుల్లో
లంచాక్షరాలుగా రాలుతుంది.
రేషన్ షాపుల బట్వాడాలో ప్రతీగింజలోనూ,
అరగింజకు నల్లరంగు పూస్తుంది.
పార్టీ కోటాలో తన వాటా పెంచేందుకు
కులం అంటూ గళం లేపి నిరాహార డేరాలేస్తుంది.
విశ్వాసపు రంగు వెలిసిపోతే
మతం మత్తు చల్లి ఎర్రరంగుని పూసేస్తుంది.

వెలుగులో ఈ చీకటి ప్రదర్శించే నాటకాలే
శంఖుస్థాపన దాటని సంక్షేమ ప్రాజెక్టులు
దొంగని,గంగిగోవని ఒప్పించే పత్రికా వ్యాసంగాలు
పదవుల బేరం కుదరక కప్పగెంతులు వేస్తుంటుంది

ఈ చీకటి తరిమెయ్యాలంటే
చిన్న,చిన్న దీపాలుగా వెలిగితే లాభం లేదోయ్
మెరుపై ఒక్కసారి మెరిసినా ప్రభావం రాదోయ్
ఉవ్వెత్తునలేచే జ్వాలగా మారిపో
ఈ చీకటిని సమూలంగా కాల్చిపో

పరస్పర వైరుద్యం

నింగినెగిరే గువ్వల్ని చూస్తే
నేలపైనున్న మనకనిపిస్తుంది
అవి అందానికి ప్రతిబింబాలనికాని దాని రెక్కల కింద ఉన్న
పచ్చిగాయాలు కానరావు.

నేలలో పాతుకుపోయిన
రాతి శిల్పాలని చూస్తే మనకనిపిస్తుంది
అవి ఆకర్షణకి, ప్రత్యక్ష తార్కాణాలని
కాని వాటి చర్మం చెక్కిన
వేనవేల ఉలిదెబ్బలు కనిపించవు.

సాయంత్రం చల్లగా తాకే
పిల్లగాలిని చూస్తే మనకనిపిస్తుంది
హాయికి మరోపేరు సంద్యాసమీరేనని
కాని కాసేపు విశ్రమించే యోగం లేని
నిరంతర కారాగారవాసులవి.

నిశ్శబ్దాన్ని ధరించిన రాత్రి
ద్వనితరంగం దరిచేరితే శబ్దాన్ని వరిస్తుంది
నిదురపుచ్చే నిశ్శబ్దం చూస్తే మనసు పరవశిస్తుంది
శబ్దం లయబద్దమయితే కర్ణం స్వరవశిస్తుంది

సృష్టి మొత్తంకలిగివుంది పరస్పరవైరుద్యం
ఎన్నో అపసృతులు,మరెన్నో ద్వంద్వ ప్రవృత్తులు ఉన్నాయి
అయినా భూమి తిరుగుతూనే ఉంది
సమదృష్టితో సమన్వయించుకుంటూ

పురోగమనం

మనిషి జీవితం అంటే
సమస్యల సంపుటే అనుకుంటా!!!
ఎప్పుడూ ఏదో ఒక సమస్యఒకదానికి పరిష్కారం వెదికే లోగా
ఇంకొకటి.. రావణుడి తలకాయల్లా

ఊహించని మలుపులెన్నో
ప్రతీ మలుపులోని ప్రశ్నించుకుంటాను
నా జీవితం సూటిగా సాగదెందుకని???
ప్రశ్నించేవరకే... జవాబు ఏమిటో
వినే సమయం కూడా లేదు.

వాతావరణం బాగాలేదని ప్రయాణం మానూంటామా?
అది అనివార్యమైతే...
జారుడుమెట్లని ఎక్కడం మానుకుంటామా?
అది అవసరం అయితే...
అలా కాకపోతే అది పరాజయం అవుతుంది.

అప్పుడప్పుడు కొన్ని,కొన్ని సమస్యలు
రొద పెడతాయ్.. సర్దుబాటు చేసుకోమని తప్పదుగా
కానీ ప్రతీ సమస్యకి సర్దుబాటంటే అది
సర్దుబాటు కాదు, లొంగుబాటే అవుతుంది.
జాగృతి చెందాల్సినప్పుడు
జోలపాటలు వింటే
వచ్చేది మగతేకాని..ప్రగతి కాదు.

నీరు పరిగెత్తకపోతే ఊతమిచ్చే
రాతికి కూడా నాచుపడుతుంది.
అందుకే బతుకుబండి ఎప్పుడూ
ఏకదిశనే కలిగి ఉండాలి
అది పురోగమనమే అయివుండాలి.

డబ్బుచేసింది

అప్పుడెప్పుడో నువ్వు బాగా బతికినప్పుడు
నీ జబ్బల్లో సత్తువున్నప్పుడు
నీ మనసు నిబ్బరం తో ఉన్నప్పుడు
నీ ఒళ్ళో కూచొని వాడు ఎంగిలి పడేటోడు
నీ భుజాలమీద సవారి చేసేటోడు

అప్పుడెప్పుడో నువ్వు సైకిల్ తొక్కేటప్పుడు
నీ గుండెలో ఆశలున్నప్పుడు
నీ రక్తానికి వేగమున్నప్పుడు
నీ ఎనక గూర్చొని బడికెళ్ళేటోడు
నీ చెమట కొన్న గుడ్డ తొడిగేటోడు

అప్పుడెప్పుడో నువ్వు అప్పుల్జేసినప్పుడు
నీ మీసం మెరిసినప్పుడు
నీ కంటిచూపు తగ్గినప్పుడు
నీ టాటా తో ఇమానం ఎక్కినోడు
నీ ఆశతో దొరలసెంత జేరినోడు

ఇప్పుడు..
నువ్వు బోర్లా పడ్డప్పుడు
నీ ఇంటిది కాటికి సేరినప్పుడు
నీ కంటనీరు ఇంకినప్పుడు
నీ పిలుపుకి అందకుండా.. దూరం లో వాడు
నీ గుండెబరువు తలకెక్కనంత భోగం లో వాడే

ఏం జేస్తాం లే అయ్యా!!!
ఆడికి డబ్బుజేసింది
ఈ రోగమొస్తే మతిమరుపు పెరుగుద్ది
గోరుముద్ద,గుర్రమాట మర్సిపోయే
ఆడికన్నమెట్టి నువ్వు జేసిన పస్తులు మర్సిపోయే
నువ్వు చేసిన అప్పులు మర్సిపోయే
నువ్వు పంచిచ్చిన రక్తమే మరిసిపోయే

ఇప్పుడు ఇంటిదానికి తలకొరివి నువ్వే బెట్టాలా
ఈలుంటే నీ సితికి నువ్వే కర్రలు సమకూర్సుకోవాల
ఆడికి డబ్బుజేసింది మరి

వెలుగు రేఖ

మనసు బాగాలేదని నేనే అనేస్కుని
మా ఊరి కొండెక్కి,శూన్యంలోకి చూస్తూ
సిగరెట్టు ముట్టించి,ఏదో ఆలోచిస్తూ
వేడి నిట్టూర్పులతో గడుపుతున్నవేళ
చూపు శూన్యం నుంచి,మాఊరి మాగాణ్యం
వైపు మళ్ళించా...అప్రయత్నం గా

మెల్లగా...మెల్ల,మెల్లగా మిగిలిఉన్న కాస్త
వెలుగుని ఆకాశానికి రాసిచ్చేసి సూర్యుడు
కొండ వెనక దాక్కుంటున్నాడు
ఆ రోజుకి తన డ్యూటి ముగిసిందన్నట్టు
చూస్తుండగానే చీకటి దోచేసింది
ఆకాశరాజ్యం నాదేనంటూ...
ఆ దర్పం కాసేపే అని తెలిసినా

బొమ్మరిల్లులా అనిపించింది ఆ చిత్రం
ఎన్నో దీపాలు బొమ్మరిల్లు భవనాల్లో
చందమామ కిందనే ఉన్నాదన్నట్లు
అంతలో చిన్న,చిన్న మిణుగురులు
మిణుకు,మిణుకు మంటూ పలకరిస్తున్నాయ్
అవి బొమ్మరిల్లు అందాన్ని భగ్నం చేసే
పూరిగుడిసెల్లో బుడ్డీ దీపాలు

ఇంతందం వాటివల్ల పాడయ్యిందని
సాంతం గుండెల్లో గుబులయ్యింది
గుడిసెల్ని,గుడిసెలోని మడుసుల్ని
ఊరినుంచి వెలెయ్యాలనిపించింది

మరికాసేపు అలాగే చూస్తుంటే
చుక్కల్లా కనిపిస్తున్నాయ్ వీదిదీపాలు
ఆ దీపాల వెలుగులో మండే
చిన్న,చిన్న మట్టిపొయ్యలు,

అప్పుడు నా ఆలోచనలు వేడెక్కాయ్
ఏవేవో సూచనలిస్తున్నాయ్
ఆ బుడ్డిదీపాల్లో చదివేదెందరు?
ఆ మట్టిపొయ్యల్లో వండేదెలా??

ఆవరించిన మత్తు వదిలేసింది
చూపులుండాల్సింది చుక్కల్లో కాదురా
చుట్టుపక్కలున్నదాన్ని మనసుతోటి చూడరా
నిద్రపోతే ఏముంటుందిలే
నిశీధి ఒకటే తేలుస్తుంది
పేద,గొప్పల తేడారా
అని నా గుండె తట్టి చెప్పింది
ఆరోజు వరకు నే చూడని
వెలుగురేఖని చూసా..

తప్పదుగా నాకు

నేనెదురు పడగానే
పక్కకు జరిగే మీ కళ్ళు
తప్పుకు తిరిగే మీ కాళ్ళు
చిరాకు విసిరే మీ నొసలు
ఇవన్నీ తెలుస్తున్నా
నా మనసుని పొడుస్తున్నా
వెర్రినవ్వు నొకదాన్ని ముఖాన
పులుముకొని పలకరిస్తుంటాను
తప్పదుగా నాకు...

కొత్త పాలసీ,కొత్త స్కీం అని చెప్పడానికి
భయం తో,బాధతో,మొహమాటం తో
ఎన్నిసార్లు కుస్తీ పట్టానో నా మనసుతో
ప్రతీసారీ నేనే నెగ్గి, మనసుని తొక్కి
కొత్త భీమాపథకాన్ని,అందమైన శతకంలా
వివరిద్దామని పిచ్చి ప్రయత్నం చేస్తూ ఉంటాను
తప్పదుగా నాకు...

నాలుగు ఇంగ్లీషు ముక్కలు జోడించైనా
ఆకట్టుకోవాలని నేను ప్రయత్నిస్తుంటే
నా పీకట్టు కోవాలన్నుట్టు మీ చూపులు
అవి నేను గమనించినా
ఆ దాడి తట్టుకోక
తప్పదుగా నాకు...

"నేను పోయాక వచ్చే సుఖం గురించి
నాకే చెబుతావేంటిరా సన్నాసి" అంటూ
మీరు విసిరే చతుర్లకి చిర్రెత్తుకొచ్చినా
నోరెత్తకుండా పాలసీ మెచ్యూర్ అయ్యాకొచ్చే
డబ్బుకోసం నే చెబుతుంటాను
తప్పదుగా నాకు...

దేశం లో ఆర్దికమాంద్యం,
జరుగుతున్న రాజకీయ 'స్కాం'
బోర్డు తిప్పిన ప్రైవేట్ బాంక్.కాం
వీటన్నిటికి నేనే కారణమంటూ
నన్నో దొంగని చేసి మాట్లాడుతుంటే
చెవికింద ఒక్కటిచ్చి చుక్కలు
చూపించాలనిపిస్తుంది
అయినా చిరునవ్వుని కాపాడేస్తుంట
తప్పదుగా నాకు...

బతకడానికి బతిమాలుకుంటున్నానని,
నిరుద్యోగ సంఘం నుంచి
బలవంతంగా బహిష్కరించబడ్డ
చిరుద్యోగి నేనని.. నేనేనని
నీకు తెలిసేదెప్పుడు???

ఆర్ద్ర మనస్కులు

ఆకాశం పారవశ్యం లో రాల్చిన
అశృ బిందువులేమో వారు
మదర్ గా ఒకరు,ఫాదర్ గా ఒకరు
జగతి గండెల్లో నిండిపోయారు

లేకపోతే ఆ కళ్ళెందుకు
కన్నీటి పరవళ్ళు తొక్కుతాయ్???
పనిచేసే పసికందుని చూస్తే..
కుష్టువ్యాధిగ్రస్తుని చూస్తే

ఆ గుండెలెందుకు బరువెక్కుతాయ్ ???
బిక్షమెత్తే అవ్వని చూస్తే...
బానిసత్వపు జనాన్ని చూస్తే
సానుభూతి సంద్రం లో మునిగిపోయిన
కాగితపు పడవలా ఆ గుండెపొరలు ఆర్ద్రతతో
ఎందుకు నిండిపోతాయ్???

ఆ నిర్మల, నిశ్చల ముఖారవిందం
చిత్రం లో చూసినా
నా మనసెందుకు సంతృప్తితో నిండిపోతుంది???

నీవు కరుణకు మరో రూపం
అవే అశృవులను నా చుట్టూ నిండి ఉన్న
ఈ జనారణ్యం లో చల్లవా
ఈ అర్ధ మనస్కులని, ఆర్ద్ర మనస్కులుగా మార్చవా

గుప్పెడు మల్లెలు-08

1) చిరునవ్వుని నీ ముఖాన చెదరనివ్వకు
    కాలం భయపడుతుంది నిన్ను నిరాశ పరిచేందుకు

2) రాజకీయం చొరబడని చోటున్నదా
    డాక్టరేట్ పట్టాలకి కూడా సిఫార్సులేకదా

3) ఒకడు పొగతాగితే అది పక్కవాడ్ని విసిగిస్తుంది
    ఒక ఇంటి కాపలా కుక్క పక్కింటివాడ్ని కరిచేస్తుంది

4) ఎన్నో శాస్త్రాలు అభ్యసించాడు మనిషి ఎప్పుడో
    క్షమశ్శాస్త్రం మాత్రం మరిచాడు..నేర్చేది ఎన్నడో

5) ఎన్నాళ్ళుంటుంది నడమంత్రపుసిరి
   ఇసుకమేడ ఉనికి వాన చినుకుతో సరి

6) రంగు నిభందన లేనిది రక్తం
    చావు,పుట్టుక లేనిదే సత్యం

7) ఎన్నిసార్లు చదివినా ఎదను కదిలించదా రసరమ్య కావ్యం
    ఎన్నిసార్లు చూసినా, ప్రతీసారి నవ్యం వసంతం

8) ఓ కవీ చుక్కల వెనక ఏముందో చూస్తావ్
    పక్కన కనిపించే నిజాలు ఎందుకు మరుస్తావ్???

9) పరీక్ష లేకుంటే ప్రతిభ అంచనా ఎలా తెలిసేది
    ఎండాకాలం లోనేకదా ఏటి పస తెలిసేది

10)ఇష్టం లేని మనసుకి మాట తలకెక్కుతుందా
    బలవంతపు ముద్ద ఒంట పడుతుందా

కాలం అంటే???

మనిషి దైవం గా ఆరాధించినా,
దెయ్యమంటూ ధూషించినా
ప్రస్థుతించినా,తిరస్కృతించినా
అన్ని భావాలకు,అన్ని బంధాలకు
అతీతమైన యోగమౌని కాలం

నిరంతర ,నిర్విరామ ప్రయాణం
దాని నైజం
కాలమహిమతో మోడు చిగురిస్తుంది
కాలం మందేస్తే గాయం మానిపోతుంది
మనిషిని తన శిశువులా లాలించే మాతృమూర్తి కాలం

అదృశ్యం గా ఉంటూనే అగుపిస్తుంది
ఉదయాస్తమయాలుగా, కదిలే ఋతుచక్రాలుగా
సృష్టిపరివర్తనానికి ప్రత్యక్ష సాక్షియైన
కాలాన్ని ఏ నిద్ర కప్పేయగలదు?
ఏ మత్తు కమ్మేయగలదు???

పంచభూతాల గతులను నిర్దేశించే కాలాన్ని
పంచాంగం లో బంధించాననుకొనే
మనిషి మందమతిని చూసి
తనలో తనే నవ్వుకుంటుంది
అశక్తతను,అదృష్టానికి అంటగట్టి
చేతగానితనాన్ని జాతకాల ముడిపెట్టే
మనిషి నైజానికి మందస్మితురాలవుతుంది

మనిషిని నడిపించే కాలాన్ని
మనిషి క్రమశిక్షణతో నడిపుకోగలిగినప్పుడే
కాలం పరవశిస్తుంది, ఆశీర్వదిస్తుంది
మనిషి మరణించినా, అతడి కీర్తిని బ్రతికిస్తుంది

గుప్పెడు మల్లెలు-07

1) సంతలో సరుకు కాదు...కొనేందుకు స్నేహం
   స్వచ్చ స్నేహానికి ఈ లోకమే దాసోహం

2) నక్కే ముల్లుంటాయ్ గులాబితో
   చిక్కని ముళ్ళుంటాయ్ జీవితాలలో

3) మార్చే కంటే మూర్ఖుని మనస్తత్వం
   ఇసుకనుంచి తైలం తీయుట సుఖం..సుఖం

4) ఇల్లైనా, ఒళ్ళైనా
   కూలితే ఖాళీ చేయక తప్పదు

5) అంతరంగాన మురికి ఉండగా
   ఏ గంగలో ములిగినేమి దండగ

6) దుఖాఃన్ని అప్పుడప్పుడు రానీ
   మంచుఎక్కువైనా మనగలగడం కష్టం

7) ఓడినవాడి కారణాలు విననక్కర్లేదు
   గెలిచినవాడు కారణాలు చెప్పక్కర్లేదు

8) మేడలకెక్కడ రూపం,గుడిసెలు చెమటోడ్చనిదే...
   ఎవడూ నాయకుడవ్వడు నలుగురూ నిలబెట్టనిదే...

9) అడుగు వర్గాలేనని తక్కువ చేయకు
   అడుగులు తిరగబడితే నీ నడక సాగేదెలా???

10) ప్రతిభకు కొలమానం కాదు స్థానబలం
     అడవిలోనైనా అందమే కోయిల గానం

గుప్పెడు మల్లెలు-06

1) భయపెడ్తూ ఆదరిస్తుంది అరణ్యం
    ఆహ్వానిస్తూ కబళిస్తుంది నగరం

2) స్థలం మీదే స్థానం విలువ..
   శ్మశానం లో గుడికడితే భక్తుడుండునా???

3) కన్నీళ్ళు ఆపేందుకు రుమాలు సరిపోతుందా
   సానుభూతి చూపిస్తే సమస్య తీరిపోతుందా

4) జాగ్రత్త తమ్ముడా..
   నటించే కన్నీళ్ళున్నాయ్ నీచుట్టూ

5) బావి లోతుని రెండు కాళ్ళతో
   ఒకేసారి కొలవకు... భవిష్యత్ ఉండదు

6) ఏ తరగతి వాడైనా ఇవి
   నేర్వక మానడు... కలలు...కల్లలు

7) పొదుపంటే మిగిలింది దాచడం కాదు
   దాచాక మిగిలింది తినడం

8) నిజాయితీ చాలా విలువైంది...
   నరం లేని నాలిక దగ్గర ఆశిస్తే ఎలా???

9) అవసరం లేకుండా కొంటూంటే
   చివరకి అవి అమ్ముకు బతకాల్సొస్తుంది

10) పాటలో మాట వినిపిస్తే క్లాస్ పాట...
    మోత వినిపిస్తే మాస్ పాట... నేటి సినీ విశ్లేషణ

మిత్రమా

అందనిదేదో అందుతుందని అపేక్షించకు మిత్రమా!!!
అందినదాన్ని అందుకునేందుకు ఉపేక్షించకు మిత్రమా!!!

ఒరుసుకుందని రాళ్ళమద్యన ఏటిపయనం ఆగునా
దాతలకోసం చేతులుచాచి నిరీక్షించకు మిత్రమా!!!

సమ్మెటేస్తే బండరాయిలే ముక్కలవ్వక ఆగునా
మాటి,మాటికి మనసునైనా పరీక్షించకు మిత్రమా!!!

తాడుతోటి బిగించి లాగితే కొండకుదురులు వచ్చునా
ప్రజ్ఞలేని ప్రయత్నమెప్పుడు సుభీక్షించదు మిత్రమా!!!

చేదుగుళికలు ఎన్నిమింగిన చెదరకోయ్ 'కోదండ'
గడచిపోయిన పీడకలలను సమీక్షించకు మిత్రమా!!!

జీవితం-గజల్

ఏ జీవితమైనా గడిచిందా ఏదో వేదన లేకుండా!!!
ఏ నాటకమైనా ముగిసిందా ఏదో వాదన లేకుండా!!!

... కలల్లోనే గడిపేస్తుంటే.. కీర్తిశిఖరం అందుతుందా
ఏ దేశమైన పురోగమించిందా ఏదో సాధన లేకుండా!!!

నీళ్ళైనా నిలకడగుంటే.. రాళ్ళల్లో నాచు మొలవదా
ఏ ధర్మమైన జన్మించిందా ఏదో శోధన లేకుండా!!!

యంత్రం ఎంత గొప్పదైనా... తానుగా నడవదులే
ఏ పాపడైనా పుడతాడా ఏదో దీవెన లేకుండా!!!

జాబిల్లి వెన్నెల చల్లితే...కలువ మురియదా "కోదండ"
ఏ మనసైనా ప్రేమిస్తుందా ఏదో స్పందన లేకుండా!!!

గుప్పెడు మల్లెలు-5

1.
 ప్రశ్నించే ప్రతీవాడు మేధావి కాడు,
సమాధానం తెలీనోడు
అజ్ఞానీ కాడు
2.
పనికిరానిదంటూ ఏదీ లేదులే లొకంలో,
పిండంవేళ పనిబడదా
మాలకాకితోనైనా
3.
కలముందని కాగితాన్ని నింపెయ్యకు,
సిరాతోటి నరాన్ని మీటు,
జనం గుండెల జాగృతి నాటు
4.
జనం ప్రవాహమైతే,
కొండనైనా కోసేస్తుంది,
రాజకీయమెంత రాతిముక్క.
5.
పద క్లిష్టత కాదు కవితకు ప్రమాణం,
భావం మృష్టాన్నమైతేనే
దానికి సార్ధక్యం.
6.
విమర్శతోనే విజ్ఞానం,
అరగదీస్తేనే
రాయి రత్నం అవుతుంది
7.
అనుభవించి రాస్తేనే కవిత్వమట,
చాలామంది కవులకందుకే,
సానికొంపల సాంగత్యమట
8.
వృధాప్రయాస ఏకాంతానికై,
మళ్ళీ,మళ్ళీ ప్రతిధ్వనించే
నీ జ్ఞాపకాలతో
9.
రసికత ఎరుగని చెవులుంటే రాగమేదైనా వృధా...
వెన్నెల ఎంత చిక్కగా ఉన్నా
అడవికాస్తే అంతేకదా...
10.
కొండమీద కురిసిన వాన నేల చేరక ఆగునా...
విజ్ఞానం వికసిస్తే
జనం మెప్పుకి దాగునా.

గుప్పెడు మల్లెలు-4

1.

నిందారోపణ నిమిషాలే
నీ ప్రేగుల్లో కూడా
మలినముందని తెలుసుకో
2.
అడుగు వర్గాలేనని తక్కువ చేయకు...
అడుగులు తిరగబడితే
నీ నడక సాగేదెలా???
3.
నాకు ఎల్లలు అనంతమనే మనిషి..
ఆరడుగుల నేలతో ముగిస్తాడు
తన ప్రస్థానాన్ని
4.
అపార్ధానికి అరనిమిషం చాలు,
క్షణం లో మేఘం,
సూర్యుని కమ్మినట్లు
5.
చూసిందే అయినా
ప్రతీసారి కొత్తే వసంతం,
రోజూ తినే ఇల్లాలి చేతి భోజనం లా
6.
యుద్ధంచేయనోడు వీరుడౌనా???
సమస్యకి భయపడితే
మనిషేనా...
7.
ప్రార్ధనెందుకు కురిసే మేఘం ఉంటే,
యాచనెందుకు
దానమిచ్చే మనసుంటే
8.
చిరుదోమ కుట్టినా చిరాకే,
చిన్నమాటైనా
అవమానమే అప్పుడప్పుడు
9.
ధరతో పోల్చకు హెచ్చూ,తగ్గూ..
గాలి ఉచితమని వదిలిస్తే
శ్వాస ఎలా???
10.
ఆలోచనలకి విలువెక్కడ
ఆచరణకి రానిదే,
మట్టిముద్దకి వెలవుంటుందా కుండ కానిదే..

గుప్పెడు మల్లెలు - 3

1) విమర్శకు విలువలు ముఖ్యం...
రంద్రాన్వేషణ చేస్తే, సంద్రాన్నైనా దొంగనొచ్చు..

2) 'బాద్యత' పులిమీద స్వారి...
అది వదిలేస్తే మనిషిగా చచ్చినట్లే...

3) సరిగమలు తెలియకున్నా...
ఆలుమగలు విద్వాంసులే... అను'రాగం'లో...

4) అవినీతుందని గుర్తేలేదు...
'అన్నా'అన్నంతవరకు.... అన్నీ చెప్పాలెవరో...

5) ఉగాది నెలకోసారొస్తే...
కనీసం మనం తెలుగోళ్ళమని, కాస్త గుర్తుండేదేమో...

6) గిల్లికజ్జాల రోజుల్పోయాయ్...
ఇప్పుడన్ని గల్లీ యుద్ధాలే...విద్యార్దుల్లో...

7) ఫట్నవాసం.. ఏమో అనుకున్నా...
వెనకనుంచి మగాడ్ని గుర్తించడం కష్టమే...

8) బాధపెట్టి బోధపరిస్తేనే...
తత్వం తెలిసేది...ఉపవాసాలందుకే...

9) గురు,శుక్రుల్లో గొప్పెవరంటే...
శుక్రుడే... రాక్షసరాజ్యం విస్తరించేగా...నలుదిశలా

10) భోజనకాలే... భగవన్
నామస్మరణహః... 'సార్, ఇప్పుడే వస్తున్నా'...

గుప్పెడు మల్లెలు - 2

1) వయస్సులో...రాళ్ళన్నా దొరకవు..
వయస్సు మీరాక పళ్ళైనా అరగవు..

2) మనిషొక్కడే సృష్టిలో....
పక్కా ప్లానింగ్ తో తప్పు చేసేది....

3) మాటల్లో పడి మర్చిపోయాడేమో...
మనిషి... మనిషిగా బ్రతకడం...

4) లోకాన రవిని...శోకాన
కవిని... ఎవరో మేల్కొలపాలా???

5) దుర్మార్గుణ్ణి సుఖంగా ఉండనీ...
సన్మార్గుడు ప్రశాంతంగా ఉంటాడు!!!

6) ప్రేమకు ప్రశ్నుండదు...
విరహానికి సమాధానముండదు...

7) తీపి అబద్దాలే బాగుంటాయేమో ఒక్కోసారి...
కవుల భావుకతలాగ... నిజం కాదని తెలిసినా...

8) చీమలు నడిచినా బండలు అరుగుతాయి....
బాంబులు పేల్చినా బండలు కరుగుతాయి..... సమయం తేడా....

9) చిన్నంబాని ఆలికి ఇమానం
కొన్నాడంట....సొమ్మున్నోడు తుమ్మినా ఇసేసమే......

10) వినయంతో.... చరిత్ర చదువు....
విజ్ఞతతో.... తిరిగిరాయి....

11) ఏదైనా... ఆస్వాదిస్తేనే....
అనుభవం పొందినట్లు..... కదా!!!

12) సంసారం.... సాగరం...
తప్పించుకోలేము... తప్పుకోనూలేమూ...

13) సంసారం.... సాగరం...
తప్పించుకోలేము... తప్పుకోనూలేమూ...

14) విచిత్రమైనది వెదురు....
ముక్కు చెక్కితే బాణం.... ప్రాణం తీస్తానంటూ...
మద్య పొడిస్తే గానం.... ప్రాణం పోస్తానంటూ....

15) ఫోర్జరి విద్య మొదలెట్టేది..
మొదలయ్యేది.... ప్రోగ్రస్ కార్డులనుంచే....

మా ఊరి స్టేషన్లో.. మండే వేసవిలో..

రైలొచ్చి ఆగంగానే
ఏవేవో పలకరింపులు
ఎన్నెన్నో పులకరింతలు
వీడుకోలు కౌగిలింతలు
కొన్ని ఆత్రంగా.. కొన్ని ఆర్ద్రంగా

ఎర్ర చొక్కాల కోలాహలం
టే,కాఫీల మాయా మేళం
వెయిటింగ్ లిస్ట్ గందరగోళం
హిందీపాటల మాదాకోళం
కొన్ని ఆత్రంగా.. కొన్ని ఆర్ద్రంగా

హోరెత్తించే ఎనౌన్స్ మెంట్లు
పడకగా మారే న్యూస్ పేపర్ కార్పెట్లు
చీట్లపేకల హడావిడి చేసే సీజన్ టికెట్లు
ఉక్కపోతకు గుక్కలుపెట్టే చంటిపాపల తల్లులపాట్లు
కొన్ని ఆత్రంగా.. కొన్ని ఆర్ద్రంగా

అతిధులు ఎందరు వచ్చినా
ఆప్తులు ఎందరు వెళ్ళినా
చలించక.. చెమర్చక
జాలిలేని రైలు భారం గా కదిలేస్తుంది
ఊళేస్తూ ... తనకేమి పట్టనట్లు
మా ఊరి స్టేషన్లో.. మండే వేసవిలో..

గుప్పెడు మల్లెలు - 1

1)నావ గోదారిని దున్నేస్తుంటే...
   చంద్రుడి సేద్యం వెన్నెల విత్తులు చల్లేస్తూ

2) ఇష్టం లేని పెళ్ళి.. తేలుస్తుంది
    మొరాయించే మనసు బరువు ఎన్ని టన్నులో...

3) ఓడానని బాధ పడకు...
    ఎలా ఆడకూడదో తెల్సినందుకు ఆనందించు...

4) రోడ్డుపై ప్రతిబండిని ఆపి...
    కధలల్లే పోలీస్ కన్నా భావుకుడెవ్వరు???

5) నీడకు నిజం తెలుసేమో...
    నేలతోనే ఉంటుంది.. నేనక్కడకే వస్తానని...25apr12

6) బతుకంతా నీటిమయం.. నోట
   చొంగతో ప్రారంభమై, కుండ చిల్లుతో అంతం...25apr12

7) చాలామంది బ్రతికేస్తున్నారు
    చంపడం చట్టవ్యతిరేకం కారణం గా...

 

8) పంచదారలో ముంచిన కుంచె
   విదిల్చిన బొట్లు కాబోలు... నీ పిలుపు...

 

9) అబద్దానికి అబద్దం అని
    ఒప్పుకోడానికి భయం... నిజంగా మారాలని...

 

10) చావు స్టాంప్ అతకించని
      పోస్ట్... ఫైను కట్టి మరీ తీస్కోవల్సిందే

 

11) జీవితాన్ని పండించుకునే
     సేద్యం పెళ్ళి.. ప్రేమనే ఎరువుతో...

 

12) మాసినగుడ్డ ఈ రాజకీయం
      ఎంత ఉతికినా ...చిల్లుపడుతుందేమోకాని తెల్లబడదు...

 

13) అంతమెరుగని ఆశ...
      అంతుచిక్కని దైవం మనిషికి ఆక్సిజన్...

 

14) ఒక్కముద్దని లాగే జిహ్వ...
      లక్షల పదాల్ని వదుల్తుంది..అదుపు ముఖ్యం...

 

15) మనకి ఆధునికత లాభించింది ఒక్క పేర్ల విషయం లోనే...
      కుల,మతాల వాసనలిచ్చే తోకలు కత్తిరించేసాయ్....వసుదైక కుటుంబం

 

16) ఊరికే వచ్చిన ధనం మెదడుని దొలిచేస్తుంది...
      తేరగా వచ్చిన బంధం మనిషినే కాల్చేస్తుంది...

 

17) చీకటికి ధైర్యం చెబుతుంది
      కీచురాయి... మనిషిని భయపెడుతూ...

 

18) రాక, పోకల మద్య వారధి
       జీవితం... కొన్ని సున్నితంగా...కొన్ని కథినంగా...

 

19) ఒంటరిగా ఉండాలంటే భయం...
      అందుకే బాత్రూం సంగీతం ప్రతీ ఇంట్లో...

 

20) వృధాప్రయాస ఏకాంతానికై...
      మళ్ళీ,మళ్ళీ ప్రతిధ్వనించే నీ జ్ఞాపకాలతో...

 

21) గొప్పోడని తెలిసేది నోట్ల
      లెక్కతో కాదు... ఓదార్చే చేతుల లెక్కతో...

 

22) సరిగమలు తెలియకున్నా...
      ఆలుమగలు విద్వాంసులే... అను'రాగం'లో...

 

23) పరులకోసం నటించకు...
      నీ పాత్రనెవ్వరూ పోషించలేరు... నువ్వుతప్ప...

 

24) హృదయనివేదన కళ్ళతో
       తక్కువచూడు లోకాన్ని.. నొప్పెక్కువవుతోంది!!!
       కళ్ళ ప్రతిస్పందన...
       హృదయమా ఎక్కువగా స్పందించకు
       ఏడ్వలేక చస్తున్నా!!!

 

25) రెక్కలొచ్చిన చిరుదోమ
      ఆశ్చర్యం... నేనొస్తుంటే ఈ చప్పట్లెందుకో???

 

26) ఒకే పొరపాటు రెండుమార్లు
      చెయ్యకు..తప్పంటారు...కొత్తవి చాలా ఉన్నాయ్...

 

27) పధకాలన్నీ ప్రజలకేనట...
      ఆలికి చీరకొనడం ఊరికి ఉపకారం లా......ఊరికుపకారం లా???