సంఘర్షణ

నీలిమబ్బు నీడలలో...
నింగినుంచి రాలుతున్న...
నీటిచుక్క జాడలలో...
మొలవని మొక్కని చూసా...
ఫలితం దక్కని ఆశని చూసా...

పల్లెలు పట్టుకొమ్మలని...
రైతన్నలే రాజులని ...
... విద్యుత్తుని ఉచితమని...
సబ్సిడీలో విత్తులని...
కోతలకాలం దాటినా...
రాతలు మారని బతుకులు చూసా..
గీతలు మారని చేతులు చూసా...

ఊరవతల నీరింకిన
చెరువు ఇసుక మేటలు...
బరువెక్కిన కన్నీటితో
నిండుకున్న కుండలు...
చెల్లిని నిండుగ కప్పని గుడ్డని చూసా...
గుక్కెడు గంజిని నింపని చిప్పని చూసా...

కాలం దయ చూపినా...
దళారి కసిచూపుల చిక్కిన...
అప్పుల తిప్పలు తప్పని...
కాలవలోని ఓ ఆకారం చూసా...
ఆక్రందనల హాహాకారం చూసా...

ఇది ఒక విలయం
ఇది ఒక ప్రళయం
ఒక సంక్షోభం
ఒక సమ్రంభం
ఇది ఒక సంఘర్షణ!!!