తెలుగు భాష

పల్లవి:

పాడేనా తెలుగుపాటే పాడాలి

పండేనా తెలుగుచేనే పండాలి

          తెలుగుని తాకుతూ పైరగాలి

          నేలకి నలుమూలల తిరగాలి

చరణం:

నన్నయ్య,తిక్కన్న మనపూర్వికులే,

అన్నమయ్య,గోపన్న తేనెపంచెలె,

          ఘనమైన పూర్వచరిత మనకున్నదిలే

          పరభాషా కోవిదులే శ్లాఘించెనులే

పాలకడలి వరదించిన యజ్ఞఫలమిదే,

నేలకొరిగి పారనీకు, అమృతమిదిలే

చరణం:

కృష్ణశాస్త్రి సాహిత్యం మనసంపదలే,

శ్రీశ్రీ విప్లవశంఖం నవచేతనలే,

         జ్ఞానపీఠం ఎక్కినాడు జనసినారె,

         గూడపాటి చెక్కినాడు మనసుతీరే,

వినయంతో మనచరిత్ర నువ్వుచదువుకో, 

విజ్ఞతతో ఆ చరిత్ర తిరగరాసుకో

చరణం:

కాలంతో మార్పన్నది అతిసహజములే,

పాశ్చాత్యం, పరిణితికి ప్రగతిపధములే

         పరభాషా ప్రావీణ్యం ఆభరణములే

         మనభాష ప్రాచుర్యం ఆచరణములే

అమ్మలాంటి తెలుగుభాష అమృతవీణ, 

జన్మంతా కొలుచుకున్న ఋణం తీరునా!!!

============================

తేదీ: 09.12.12; 03;12