గుప్పెడు మల్లెలు-08

1) చిరునవ్వుని నీ ముఖాన చెదరనివ్వకు
    కాలం భయపడుతుంది నిన్ను నిరాశ పరిచేందుకు

2) రాజకీయం చొరబడని చోటున్నదా
    డాక్టరేట్ పట్టాలకి కూడా సిఫార్సులేకదా

3) ఒకడు పొగతాగితే అది పక్కవాడ్ని విసిగిస్తుంది
    ఒక ఇంటి కాపలా కుక్క పక్కింటివాడ్ని కరిచేస్తుంది

4) ఎన్నో శాస్త్రాలు అభ్యసించాడు మనిషి ఎప్పుడో
    క్షమశ్శాస్త్రం మాత్రం మరిచాడు..నేర్చేది ఎన్నడో

5) ఎన్నాళ్ళుంటుంది నడమంత్రపుసిరి
   ఇసుకమేడ ఉనికి వాన చినుకుతో సరి

6) రంగు నిభందన లేనిది రక్తం
    చావు,పుట్టుక లేనిదే సత్యం

7) ఎన్నిసార్లు చదివినా ఎదను కదిలించదా రసరమ్య కావ్యం
    ఎన్నిసార్లు చూసినా, ప్రతీసారి నవ్యం వసంతం

8) ఓ కవీ చుక్కల వెనక ఏముందో చూస్తావ్
    పక్కన కనిపించే నిజాలు ఎందుకు మరుస్తావ్???

9) పరీక్ష లేకుంటే ప్రతిభ అంచనా ఎలా తెలిసేది
    ఎండాకాలం లోనేకదా ఏటి పస తెలిసేది

10)ఇష్టం లేని మనసుకి మాట తలకెక్కుతుందా
    బలవంతపు ముద్ద ఒంట పడుతుందా