తృప్తి

అద్దం లో నన్ను,నేను చూసుకుంటూ
జాలిపడటం అలవాటైపోయింది.
గడిచిన పది రోజుల్లో ఇది ఆరోసారి 
నా మీద నేను జాలిపడటం

కళ్ళ కింద కాస్త నల్లబడ్డ,
చెంపలపై కాస్త తెల్లబడ్డ,
చర్మం అక్కడక్కడ ముడతలుబడ్డ,
మనిషిని బలంగానే ఉన్నానే!

అయినా పక్కింటి అమ్మాయి పలకరించిన
ప్రతీసారీ "అంకుల్,అక్క ఉందా?"
అని అడుగుతుంది ఎందుకో???
అది విని నా మనసేడుస్తుంది ఎందుకో???
ఎన్ని క్రీములు రాసినా,ఎంత పౌడర్ పూసినా
ఈ కళ్ళ కింద నలుపు పోదెందుకో???
అబద్దం ఆడుతోంది అద్దమా???అమ్మాయా???

అబద్దం ఆడుతోంది అమ్మాయే...
లేకపోతే వాళ్ళమ్మాయి నాతో
"నేను నీకు అమ్మనంట!!!
నీకు అన్నం పెడతానంట"
అంటూ నా అరచేతిని ఆకునిచేసి
ఉత్తుత్తి భోజనం పెడుతుందా???
ఇప్పుడు తృప్తిగా ఉంది
ఫేషన్ షోలో పాల్గొన్నంత తృప్తిగా
==================
Date: 11-07-2012