సమైక్యాంధ్ర గీతం

పల్లవి:-
రండోయ్... రా రండోయ్...
చేతులు కలిపి రా రండోయ్,
చేవను చూపగ రా రండోయ్,
సత్తా తెలిసేలాగ,
సర్కార్ కదిలేదాక,
జై ఆంధ్ర పోరుతో సాగండోయ్

చరణం 1 :-
ఐకమత్యమే మహాబలం,
ఇది ఎపుడో చదివిన పాఠం,
పదవి మత్తులో మరిచిందేమో,
ఇప్పటి ఢిల్లీ పీఠం,
అందరు కలిసి ముందుకి దూకి,
గొంతులు కలిపి గర్జనచేసి,
సరిహద్దుని చెరిపేద్దాం,
తొలిపొద్దుని పిలిచేద్దాం............ ||రండోయ్||
చరణం 2 :-
ఆదిపత్యమే అలంకారం,
అని తలిచెను ఏదో స్వార్ధం,
ఉద్యమానికే ఊపిరిపోసి,
చెయ్యర దాన్ని వ్యర్ధం,
వేసిన ఎత్తులు చిత్తుగ చేసి,
పెట్టిన ఆంక్షలు, పక్కకుతోసి
శృంఖలాలు తెంచేద్దాం,
శంఖం పూరించేద్దాం...............||రండోయ్||
చరణం 3 :-
తగువులెట్టి, తమాషచూసే,
శకునులు చేసిన తంత్రం,
మాతృభూమినే, ముక్కలుజేసే
ముష్కర మాయామంత్రం,
శక్తులు అన్నీ ఒకటిగజేసి,
యుక్తులు మొత్తం బద్దలుజేసి,
తొడగొట్టి నిలబడదాం,
జయకేతనం ఎగరేద్దాం..............||రండోయ్||
==============================
Date: 20/08/2013


https://soundcloud.com/kodanda-rao/jai-samaikyandhra